Ըստ 2020 թ. նոյեմբերի 10-ին ստորագրված եռակողմ հայտարարության, Ադրբեջանի սահմանապահ զորքերը տեղակայվում են բարելավված եղանակային պայմաններով Հայաստանի հետ սահմանակից Լաչինի և Քելբաջարի շրջաններում, որոնք ունեն դժվար լեռնային տեղանք և կլիմայական պայմաններ: Այս մասին հայտարարություն է տարածել Ադրբեջանի ԱԳՆ-ն։
Բաքուն Երևանի հայտարարությունները «սադրանք» է որակում։
«Մայիսի 12-ից Ադրբեջանի Պետական սահմանապահ ծառայության ղեկավարությունն ուղարկվել է տեղանք, բանակցություններ են ընթանում մյուս կողմի սահմանապահների հետ և ձեռնարկվում են իրավիճակը կարգավորելու քայլեր․․․Մենք անընդունելի ենք համարում պաշտոնական շրջանակների փորձերը` այդ հարցը քաղաքական նպատակներով օգտագործելու համար՝ կապված Հայաստանում նախընտրական իրավիճակի հետ», – ասված է հաղորդագրության մեջ:
Նշենք, որ ադրբեջանական կողմը նշված միջադեպի վերաբերյալ որևէ տեղեկություն, մինչև Ռուսաստանի և Ադրբեջանի արտաքին գործերի նախարարներ Սերգեյ Լավրովի և Ջեյհուն Բայրամովի հեռախոսազրույցը, չէր հրապարակում։
Հիշեցնենք, որ վարչապետի պաշտոնակատար Նիկոլ Փաշինյանը անվտանգության խորհրդի նիստում հանձնարարել է արտաքին գործերի նախարարի պաշտոնակատար Արա Այվազյանին, պաշտպանության նախարար Վաղարշակ Հարությունյանին և անվտանգության խորհրդի քարտուղար Արմեն Գրիգորյանին՝ խորհրդակցություններ սկսել ՀԱՊԿ-ի հետ՝ Սյունիքի և Գեղարքունիքի մարզերի որոշ հատվածներում ադրբեջանական զորամիավորումների կողմից ՀՀ պետական սահմանի հատման հետ կապված:
Ավելին վաղ ՀԱՊԿ գլխավոր քարտուղար Ստանիսլավ Զասը ՀՀ պաշտպանության նախարար պաշտոնակատար Վաղարշակ Հարությունյանի և ԱԳ նախարար Արա Այվազյանի հետ հեռախոսազրույցի ընթացքում քննարկել է Սյունիքի մարզում ստեղծված իրավիճակը:
«ՀԱՊԿ-ում ուշադիր հետևում են Սյունիքի մարզի սահմանամերձ շրջաններում իրավիճակի զարգացմանը, և անհրաժեշտության դեպքում կձեռնարկվեն Կոլեկտիվ անվտանգության Պայմանագրով ու ՀԱՊԿ Կանոնադրությամբ նախատեսված քայլեր», – ասվում է կազմակերպության հաղորդագրությունում:
Մայիսի 12-ին Անվտանգության խորհրդի նիստի ընթացքում ՀՀ վարչապետի պաշտոնակատար Նիկոլ Փաշինյանը հայտնել էր, որ ադրբեջանական զինված ուժերը Սյունիքի մարզի Սև լիճ տեղանքում հատել են Հայաստանի Հանրապետության պետական սահմանը և խորացել մինչև 3,5 կիլոմետր:
