Մայիսի 4-ին, ժամը 23.00-ին, հիվանդանոցից ոստիկանության Էրեբունու բաժին հաղորդում էր ստացվել, որ «ձախ գոտկային շրջանի և աջ թիկնային շրջանի կտրած-ծակած վերք» ախտորոշմամբ բուժօգնության է դիմել Երևանի 18-ամյա մի բնակիչ: Ըստ հիվանդի ուղեկցողի` նա վնասվածքը ստացել էր Նոր Արեշում: Ըստ բժշկի տեղեկանքի` երիտասարդը ի վիճակի չի եղել բացատրություն տալու:
Այս մասին տեղեկանում ենք ոստիկանությունից:
Ոստիկանության ՔՈ գլխավոր վարչության և Էրեբունու բաժնի ծառայողների համատեղ ձեռնարկած օպերատիվ-հետախուզական միջոցառումների արդյունքում պարզվել է, որ երիտասարդին մարմնական վնասվածքները պատճառել է Նոր Արեշի 18-ամյա մի բնակիչ, որը բացատրական աշխատանքի շնորհիվ մայիսի 5-ին, ժամը 03.10-ին, ներկայացել է ոստիկանության Էրեբունու բաժին, տվել խոստովանական ցուցմունք և ներկայացրել հանցագործության գործիք դանակը: Հարուցված քրեական գործի նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
