Կորոնավիրուսի հարավաֆրիկյան շտամով վարակման առաջին դեպքը Գերմանիայում հայտնաբերվել է հարավ-արևմուտքում գտնվող Բադեն-Վյուրթեմբերգ դաշնային նահանգում, հայտնել է սոցիալական քաղաքականության և հողերի ինտեգրման նախարարությունը:
Այս մասին հայտնում է «ՌԻԱ Նովոստի» լրատվական գործակալությունը։
«B.1.351-ի մուտացված տարբերակը առաջին անգամ հայտնաբերվել է մի ընտանիքում, որը Հարավային Աֆրիկայից Բադեն-Վյուրթեմբերգ է ժամանել 2020 թվականի դեկտեմբերի 13-ին: Սա Գերմանիայում հայտնաբերված առաջին դեպքն է», – ասված է գործակալության մամուլի հաղորդագրության մեջ:
Տեղ հասնելուց հետո ընտանիքը կարանտինում է եղել, ասել են նախարարությունից: Հինգ օր անց ընտանիքի բոլոր անդամները անցել են կորոնավիրուսի թեստեր, որոնք պարզվել է, որ բացասական են: Մի քանի օր անց նրանց մոտ սկսվել են մեղմ ախտանիշներ:
Ընտանիքում հիվանդացած անձի երկրորդ թեստը ուղարկվել է լաբորատորիա, որը հաստատել է Հարավային Աֆրիկայից ստացված շտամով վարակման դեպքը: Ներկայումս կորոնավիրուսը հայտնաբերվել է երեք տնից վեց մարդու մոտ:
501.V2 կամ B.1.351 շտամը առաջին անգամ հայտնաբերվել է հոկտեմբերին Հարավային Աֆրիկայում: Համաձայն հիվանդությունների վերահսկման եւ կանխարգելման եվրոպական կենտրոնի (ECDC)՝ այս տեսակն այժմ Հարավային Աֆրիկայում վիրուսի գերակշռող տեսակն է:
Հիշեցնենք, որ դեկտեմբերի կեսերին Մեծ Բրիտանիայում ևս հայտնաբերվեց SARS-CoV-2 կորոնավիրուսի նոր մուտացիա։ Ավելի ուշ Միացյալ Թագավորության Խորհրդատվական խորհուրդը նոր և զարգացող շնչառական վիրուսային սպառնալիքների վերաբերյալ հաստատեց, որ երկրում հայտնաբերված կորոնավիրուսի տարբերակը տարածվում է ավելի արագ տեմպերով և պահանջում է էլ ավելի զգուշություն բնակչության կողմից:
Վիրուսի բրիտանական և հարավաֆրիկյան տեսակները, ըստ նախնական գնահատականների, կարող են ավելի վարակիչ լինել, քան սովորականը, սակայն դա չի նշանակում, որ ավելի վտանգավոր են մահվան կամ հոսպիտալացման տեսանկյունից:
