Լեռնային Ղարաբաղի պաշտպանության նախկին նախարար, Արցախի հերոս, Արցախի անվտանգության խորհրդի նախկին քարտուղար Սամվել Բաբայանը «Մերոնք» հաղորդման շրջանակներում տված հարցազրույցի ժամանակ ասել է․
«Սեպտեմբերի 27-ի առավոտյան Արցախի ՊԲ-ն 15 րոպեում արդեն կորցրել էր հակաօդային ուժերի 50 տոկոսը, հրետանու՝ 40 տոկոսը: Սա շատ մեծ աղետ է, Ս-300-ը հենց առաջին օրը խփվեց էդ 15 րոպեում։ Դրանից հետո հրետանին կարկուտի պես սկսեց թափել երեխեքի գլխին ամբողջ ռազմաճակատով, բայց գլխավոր երկու ուղղություններն էին՝ Թալիշ- Մատաղիսի և Հորադիսի ուղղությունները»։
Խոսելով պաշտպանության կազմակերպման մասին՝ Բաբայանն ասել է․
«Պաշտպանություն կազմակերպել մի տարածքում, որտեղ ազատ է ամբողջը, պետք է լուրջ զորք ունենալ, որ հնարավոր լինի կազմակերպել պաշտպանությունը։ Իսկ մեր կողմը ընդհանրապես պատրաստ չէր դրան։ Արցախում երբ պիտի հավաքվեր ամբողջ ՄՈԲ ռեսուրսը՝ 17500, իսկ առաջին փուլում՝ 7500-8000, առաջին փուլը 90%-ով կատարվել է, դրանից հետո չի կատարվել, որովհետև պետությունը պետք էր ռազմական դրության մեջ պահել, ինչը չի կատարվել, և եղել է նաև ազատ տեղաշարժ»։
Նրա խոսքով՝ հետո, երբ ստուգել են, թե այդ 8000-ից ինչքանն են զորքերում, մոտ 3000-ը բացակայել են։
«Հայաստանը, որ պետք է տար 11000-ից ավելի ՄՈԲ ռեսուրս, տվել է 6-7 հազար»,- նշել է նա։
Սամվել Բաբայանի խոսքով՝ անթույլատրելի է, երբ արցախցին չի մնում, չի կռվում Արցախում․ «Այդ դեպքում ինչքան էլ մենք անենք, չի ստացվելու»,- ասել է Սամվել Բաբայանը։
