Համացանցում տարածվում է տեղեկատվություն այն մասին, որ «Գագիկ Ծառուկյան» բարեգհործական հիմնադրամի միջոցով ախտահանվում են Երեւան քաղաքի հանրային տարածքները՝ կանգառները, հանրային տրանսպորտի միջոցները, աղբամանները եւ այլն: Այս մասին հայտնում են Երևանի քաղաքապետարանից։
«Տեղեկացնում ենք, որ «Գագիկ Ծառուկյան» բարեգործական հիմնադրամի՝ նշված գործողությունները համաձայնեցված չեն քաղաքային իշխանության հետ: Երեւան համայնքի համար ընդունելի է ցանկացած աջակցություն, այդ թվում, հասարակական կազմակերպությունների կողմից: Այնուհանդերձ, հորդորում ենք՝ քաղաքին նման կարգի աջակցություն տրամադրելու մտադրության դեպքում անպայման համաձայնեցնել դրանք քաղաքային իշխանության մարմինների հետ՝ առնվազն աջակցությունը ավելի արդյունավետ դարձնելու եւ անվտանգության նկատառումներով:
Հատկապես արտակարգ դրության ռեժիմի պայմաններում որեւէ ինքնագործունեություն անթույլատրելի է:
Երեւան համայնքի միջոցներով քաղաքապետարանի ենթակայության կազմակերպությունները, ՀՀ արտակարգ իրավիճակների նախարարության հետ համագործակցությամբ, ամենօրյա ռեժիմով ախտահանում են հանրային տարածքները, այդ թվում՝ կանգառները, աղբամանները եւ տրանսպորտային միջոցները եւ այլն: Իսկ բազմաբնակարան շենքերի ախտահանումը արվում է գերազանցապես համատիրությունների ուժերով՝ վարչական շրջանների աշխատակազմերի աջակցությամբ»,-նշված է հաղորդագրության մեջ:
