Առաջին ատյանի ընդհանուր իրավասության դատարանի ռեզերվային դատավոր Արայիկ Մելքումյանին Բարձրագույն դատական խորհուրդը առաջարկել է Սյունիքի կամ Տավուշի մարզի առաջին ատյանի ընդհանուր իրավասության դատարանի դատավորի քաղաքացիական մասնագիտացման թափուր պաշտոնի տեղերից մեկում իր թեկնածությունը Հանրապետության նախագահի նշանակմանը ներկայացնել:
Հիշեցնենք, որ 2019 թվականի փետրվարի 14-ին Բարձրագույն դատական խորհուրդը հրապարակել է Երևան քաղաքի առաջին ատյանի ընդհանուր իրավասության դատարանի դատավոր Արայիկ Մելքումյանին կարգապահական պատասխանատվության ենթարկելու հարցի վերաբերյալ որոշումը, որի համաձայն, դատավորի լիազորությունները դադարեցվել են:
Սակայն դրույթը, որով դատավորի լիազորությունները դադարեցվել են, ՍԴ-ն հակասահմանադրական է ճանաչել։ Արայիկ Մելքումյանը դիմել է ԲԴԽ-ին՝ դատավորի իր լիազորությունները վերականգնելու պահանջով։
Բարձրագույն դատական խորհուրդը մասնակի բավարարել է ընդհանուր իրավասության դատարանի դատավոր Արայիկ Մելքումյանի պահանջը: Նա ընդգրկվել է դատավորների ռեզերվում:
