Աշխատանքի և սոցիալական հարցերի նախարարութունը հանրային քննարկման է ներկայացրել «Անձի ֆունկցիոնալության գնահատման մասին» ՀՀ օրենքի նախագիծը:
Օրենքը կսահմանի ՀՀ-ում անձի ֆունկցիոնալության գնահատման կազմակերպական և իրավական հիմքերը, ֆունկցիոնալության գնահատման նպատակները, անձի ֆունկցիոնալության գնահատման ոլորտում ՀՀ կառավարության, պետական կառավարման համակարգի մարմնի լիազորությունները, ինչպես նաև կկարգավորի ֆունկցիոնալության գնահատմանն առնչվող այլ հարաբերություններ:
Օրենքի գործողությունը կտարածվի ՀՀ քաղաքացիների, ինչպես նաև ՀՀ-ում բնակության իրավունք կամ կացության կարգավիճակ ունեցող և բնակվող օտարերկրացի և քաղաքացիություն չունեցող, փախստականի կարգավիճակ ունեցող անձանց վրա՝ ՀՀ վավերացրած միջազգային պայմանագրերով, ՀՀ օրենքներով և այլ իրավական ակտերով նախատեսված դեպքերում:
Անձի ֆունկցիոնալության գնահատման ոլորտում ՀՀ կառավարությունը՝ կմշակի և կիրականացնի ֆունկցիոնալության գնահատման ոլորտում միասնական պետական քաղաքականությունը, կհաստատի հաշմանդամության գնահատման համակարգի բարեփոխումների և անձի ֆունկցիոնալության գնահատման համակարգի ներդրման ծրագիրը, անձի ֆունկցիոնալության գնահատման կարգը, ծառայությունների անհատական ծրագրերը կազմելու և իրականացնելու կարգը, անձի ֆունկցիոնալության գնահատման հիման վրա ծառայություններ տրամադրելու կարգը, աշխատանքային պարտականությունների կատարման հետ կապված վնասվածքների, մասնագիտական հիվանդության կամ առողջությանը հասցված այլ վնասի դեպքում մասնագիտական աշխատունակության կորստի աստիճանը սահմանելու կարգը և չափանիշները:
Գնահատման արդյունքում անձը կճանաչվի հաշմանդամություն ունեցող անձ (երեխա) կամ չի ճանաչվի, կորոշվի նրա ֆունկցիոնալության սահմանափակման աստիճանը՝ թեթև, միջին, ծանր, խորը, մշակվում է ծառայությունների անհատական ծրագիրը:
Անձի ֆունկցիոնալության գնահատումը կիրականացվի անձի կամ նրա օրինական ներկայացուցչի դիմումի հիման վրա՝ հետևյալ դեպքերում.
- հաշմանդամություն ունեցող անձ (երեխա) ճանաչելու.
- անձի ֆունկցիոնալության սահմանփակման աստիճանը որոշելու,
- հաշմանդամության ժամկետը լրանալու,
- անձի առողջական վիճակի փոփոխության,
- գնահատման կենտրոնի կողմից կայացրած որոշումը (վարչական ակտը) բողոքարկելու,
- ծառայությունների անհատական ծրագիր կազմելու կամ դրանում փոփոխություն կատարելու,
- անձի մասնագիտական աշխատունակության կորստի աստիճանը որոշելու,
- հաշմանդամության պատճառական կապը որոշելու,
- ժամանակավոր անաշխատունակության ժամկետը երկարաձգելու,
- մահվան պատճառական կապը որոշելու:
Նախագծի հիմնավորման մեջ նշվում է, որ կարգավորման նպատակն է հաշմանդամության սահմանման մոդելից անցնել ֆունկցիոնալության գնահատման մոդելի, որը հնարավորություն կընձեռի իրականացնել անձի կարիքների բազմակողմանի գնահատում, հաշմանդամությունը դիտարկել ըստ անձի ֆունկցիանալության սահմանափակման աստիճանի, նրա գործունեության և մասնակցության վրա միջավայրային գործոնների ունեցած ազդեցության:
