Վարչապետի աշխատակազմը հանրային քննարկման է ներկայացրել «Բարեգործության մասին» ՀՀ օրենքում փոփոխություններ և լրացումներ կատարելու մասին» օրենքի նախագիծը:

Նախատեսվում է, որ օրենքը կկարգավորի բարեգործության իրականացման ընթացքում ծագող հարաբերությունները, կսահմանի բարեգործության կարգավորման իրավական հիմքերը, նպատակները, իրականացման սկզբունքները, պետության կողմից բարեգործությանն աջակցելու ձևերը, բարեգործական և բարեգործական ծրագրեր իրականացնող կազմակերպությունների գործունեության առանձնահատկությունները:

Լիազորված մարմինը կիրականացնի հետևյալ գործառույթները.

1) օրենքով սահմանված բարեգործության նպատակների իրականացմանն ուղղված ծրագրերը՝ որպես բարեգործական որակում և գրանցում,

2) ծրագրի` բարեգործական որակումը փոփոխելը (չեղյալ ճանաչելը), իսկ եթե նման որակումը բխում է այլ իրավական ակտից, ապա այդ որակումը փոփոխելու մասին առաջարկություն ներկայացնելը տվյալ իրավական ակտն ընդունած մարմին,

3) որպես բարեգործական որակված ծրագրերի հետ անմիջականորեն կապված և դրանց համար զգալի նշանակություն ունեցող ապրանքների և ծառայությունների շրջանակը որոշելը,

4) որպես բարեգործական որակված ծրագրերի վարչական ռեգիստրը վարելը, ներառյալ՝ բարեգործական ծրագրերը գրանցելը, բարեգործական աջակցության և կամավորների կատարած աշխատանքի հաշվառումը վարելը,

5) որպես բարեգործական որակված ծրագրերի ընթացքի և ավարտի վերաբերյալ տեղեկատվություն ստանալը,

6) դրամական և բնամթերային նվիրաբերություններն ու նվիրատվությունները սահմանված ժամկետներում չօգտագործվելու դեպքում դրանց օգտագործման ժամկետների երկարաձգումը մինչև վեց ամիս ժամկետով,

7) բարեգործական ծրագրերի իրականացման փորձի ուսումնասիրությունը, դրանց արդյունավետության բարձրացման միջոցներ ձեռնարկելը, այդ թվում` անհրաժեշտ միջոցներ ձեռնարկելու, ներառյալ՝ ստուգում անցկացնելու վերաբերյալ համապատասխան պետական մարմիններ միջնորդություններ ներկայացնելը,

8) որպես բարեգործական որակված ծրագրերի ընթացքի ու արդյունավետության գնա-հատման մշտադիտարկում (մոնիթորինգ) իրականացնելը, ավարտի վերաբերյալ ամփոփ տեղեկատվության քննարկումը և ծրագրի իրականացման հավաստումը,

9) բարեգործության կարգով Հայաստանի Հանրապետության կողմից ստացված ապրանքների հաշվառման ու բաշխման աշխատանքները կազմակերպելը` Կառավարության` տվյալ ապրանքների տնօրինման մասին որոշմանը համապատասխան,

10) բարեգործության բնագավառում հրապարակայնություն ապահովելը,

11) օրենքով սահմանված այլ գործառույթների իրականացումը:

Բարեգործական ծրագրի ներկայացման ձևը կսահմանի լիազորված մարմինը:

Բարեգործական ծրագրերի իրականացման հետ կապված կազմակերպական ծախսեր  կհամարվեն բարեգործական ծրագրերի իրականացմանը մասնակցող անձանց աշխատավարձը, իրականացնող կազմակերպությունների նյութատեխնիկական ապահովման և գործուղման հետ կապված ծախսերը, իրականացնող կազմակերպությունների գործունեության մասին հաշվետվության և տեղեկատվության հրապարակման վրա ծախսված միջոցները:

Օրենքի պահանջներին բարեգործական ծրագիր իրականացնող կազմակերպության գործունեության համապատասխանության նկատմամբ վերահսկողությունը կիրականացնի լիազորված մարմինը: Բարեգործական ծրագիր իրականացնող կազմակերպությունը լիազորված մարմին կներկայացնի իր գործունեության մասին տարեկան հաշվետվություն:

Լիազորված մարմինն իրեն ներկայացված փաստաթղթերի հիման վրա կատարած ուսումնասիրությունների և մշտադիտարկման արդյունքում խախտումների հատկանիշներ հայտնաբերելու դեպքում կազմակերպությունում ստուգում անցկացնելու միջնորդությամբ կդիմի իրավասու մարմիններ:

Բարեգործական ծրագրերի ընթացքի ու արդյունավետության գնահատման մշտադիտարկում (մոնիթորինգ) իրականացնելու կարգը կսահմանի և կհաստատի լիազորված մարմինը:

Նախագծի հիմնավորման մեջ ասվում է, որ գործող իրավական կարգավորումներով նախատեսված է վերահսկողություն իրականացնել միայն բարեգործական կազմակերպությունների կողմից ներկայացված տեղեկատվության (հաշվետվությունների) հիման վրա, ինչը հնարավորություն չի տալիս բարեգործական ծրագրերի իրականացման արդունավետությունը գնահատելու համար լիարժեք տեղեկություններ ստանալ ծրագրերի իրականացման ընթացքի և ավարտի վերաբերյալ:

Բարեգործական ծրագիր իրականացնող կազմակերպությունը լիազորված մարմին կներկայացնի իր գործունեության մասին տարեկան հաշվետվություն