Պաշտպանության նախարարությունը հանրային քննարկման է ներկայացրել «Գույքահարկի մասին» օրենքում փոփոխություններ կատարելու մասին նախագիծը:
Նախատեսվում է, որ ծառայության ընթացքում գույքահարկից կազատվեն ՀՀ միջազգային պայմանագրերով դաշնակից երկրների, ինչպես նաև ՀՀ զինված ուժերում և այլ զորքերում օրենքով սահմանված զորակոչի միջոցով պարտադիր զինվորական ծառայություն անցնող զինծառայողները:
Պարտադիր զինվորական ծառայության ժամկետի ավարտից հետո, գույքահարկից կազատվեն նաև ՀՀ զինված ուժերում և այլ զորքերում ծառայություն անցած` ռազմաուսումնական հաստատություններն ավարտած անձինք` հասարակական և արտադրական նշանակության շինություն չհանդիսացող մեկ շինության մասով, որի հարկման բազան չի գերազանցում 40 միլիոն դրամը և մեկ փոխադրամիջոցի մասով, որի հարկման բազան չի գերազանցում 150 ձիաուժը:
Սահմանված արտոնությունների իրավունքը կդադարի զինծառայողին զինվորական ծառայությունից արձակելու, ինչպես նաև հարկվող օբյեկտ համարվող գույքը զինվորական ծառայության ընթացքում վարձակալության կամ հավատարմագրային կառավարման հանձնված լինելու դեպքերում:
Նախագծի հիմնավորման մեջ նշվում է, որ նպատակն է ապահովել գույքահարկի արտոնություններից օգտվող զինծառայողների կողմից սահմանված իրավունքի իրացման անխոչընդոտ գործընթացը:
