Ամուլսարում դաշտային ուսումնասիրություններ չեն իրականացվել, այլ ուսումնասիրություններ են իրականացվել: Այս մասին այսօր՝ օգոստոսի 26-ին, լրագրողների հետ զրույցում հայտնեց Քննչական կոմիտեի կոռուպցիոն, սեփականության դեմ ուղղված հանցագործությունների և կիբեռհանցագործությունների քննության վարչության պետ Յուրա Իվանյանը:
Վերջինիս խոսքով Advanced Resources Development (ELARD) ընկերություն վերցրել և ուսումնասիրել է ոչ միայն «Լիդիան Արմենիայի» կողմից ներկայացված փաստաթղթերը, այլ նաև մյուս կառույցների գիտական, պետական մարմինների կողմից ներկայացված հետազոտությունները, հասարակական կազմակերպությունների կողմից ներկայացված ուսումնասիրությունները:
«ELARD-ը նաև ուսումնասիրել է միջազգային կարգի փորձագետների ուսումնասիրությունները և ամբողջը հետազոտելով հանգել է հետևությունների: Դա, ըստ էության, փորձաքննություն է և սոսկ փաստաթղթերի ուսումնասիրություն չէ: Փորձաքննության եզրակացությունը, վայրույթի շրջանակներում, հանդիսանում է ապացույցի տեսակ և դա գնահատվում է այլ փաստական տվյալների հետ համակցության մեջ: Եթե այն չհերքվի այլ փաստական տվյալներով, ապա փորձաքննությունը համարվում է հավաստի»,-նշեց Իվանյանը:
Նրա խոսքով՝ 400 հազար դոլարը, որը ծախսվել է պետական բյուջեից ELARD-ի փորձաքննության ստացման վրա, միջազգայնորեն ընդունված գներ են. «Այդպիսի փորձաքննությունները այդ գների սահմններում են իրականացվում»:
