Կառավարությունն այսօր՝ օգոստոսի 1-ին, հերթական նիստի ժամանակ որոշումկ ընդունի «Անասնաբուժասանիտարիայի և բուսասանիտարիայի ծառայությունների կենտրոն» պետական ոչ առևտրային կազմակերպությունը լուծարելու մասին:
Որոշման նախագծի հիմնավորման մեջ նշվում է, որ այն լուծարելու մասին որոշման ընդունումը պայմանավորված է առևտրային կազմակերպության գործունեությունը շարունակելու ոչ նպատակահարմարությամբ:
Նախագծի ընդունման դեպքում ակնկալվում է անասնաբուժասանիտարական և բուսասանիտարական ծառայությունների որակի բարձրացում և պետական բյուջեի միջոցների արդյունավետ օգտագործում, ինչպես նաև ՊՈԱԿ-ի գործառույթները կիրականացվեն էկոնոմիկայի նախարարության միջոցով:
Նշվում է նաև, որ «Անասնաբուժասանիտարիայի և բուսասանիտարիայի ծառայությունների կենտրոն» պետական ոչ առևտրային կազմակերպությունը իրականացնում է հետևյալ գործառույթները.
- բույսերի պաշտպանության ու կարանտինի, անասնաբուժության բնագավառներում պետական ծրագրերի իրականացումը,
- բույսերի ոչ կարանտին վնասակար օրգանիզմների ուսումնասիրության իրականացումը,
- Հայաստանի Հանրապետությունում իրականացվող հակաանասնահամաճարակային միջոցառումների, կենդանիների կարանտինային հիվանդությունների առաջացման դեպքում աշխատանքների իրականացումը,
- գյուղատնտեսական կենդանիների հաշվառման, համարակալման և գրանցման միջոցառումների իրականացումը,
- մարդու և կենդանիների համար ընդհանուր վարակիչ հիվանդությունների կանխարգելմանն ու վերացմանն ուղղված միջոցառումների իրականացումը,
- անասնաբուժական ծառայության իրականացումը,
- կենդանական ծագման հումքի և մթերքի, կերերի, լրացակերերի, կերային խառնուրդների, կերային հավելումների, ինչպես նաև կենդանիների դիակների ոչնչացման կամ տեխնիկական օգտահանման գործընթացների իրականացումը, կարանտինի սահմանման ժամանակ բույսերի, բուսական արտադրանքի, կարգավորվող առարկաների վարակազերծման և ոչնչացման գործընթացների իրականացումը։
ՀՀ վարչապետի 2018 թվականի նոյեմբերի 5-ի N 05/05.9/37579-18 հանձնարարականով (6-րդ ենթակետ) առաջարկվել է մշակել և ներկայացնել մի շարք պետական ոչ առևտրային կազմակերպությունների օպտիմալացման վերաբերյալ առաջարկություններ, որի հիման վրա մշակվել է «Անասնաբուժասանիտարիայի և բուսասանիտարիայի ծառայությունների կենտրոն» պետական ոչ առևտրային կազմակերպությունը լուծարելու մասին» ՀՀ կառավարության որոշման նախագիծը:
