Երևանի ընդհանուր իրավասության դատարանում այսօր՝ մայիսի 14-ին, շարունակվում է 2008-ի «Մարտի 1»-ի գործից առանձնացված մասի քննությունը՝ Հայաստանի Հանրապետության պաշտոնաթող նախագահ Ռոբերտ Քոչարյանի, ՀՀ զինված ուժերի գլխավոր շտաբի պետի պաշտոնը զբաղեցրած Սեյրան Օհանյանի, ՀՀ պաշտպանության նախարարի տեղակալի պաշտոնը զբաղեցած Յուրի Խաչատուրովի և ՀՀ նախագահի աշխատակազմի ղեկավարի պաշտոնը զբաղեցրած Արմեն Գևորգյանի վերաբերյալ:
Քննարկվում է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոցի վերաբերյալ հարցը:
Դատախազները խափանման միջոց կալանավորումը կիրառելու համար հիմք են ներկայացնում վկաների վրա ազդելու հնարավորությունը: Նրանք չեն կարծում, որ դատավարությանը չմասնակցելու կամ փախնելու վտանգ կա:
Քիչ առաջ պաշտոնաթող նախագահի փաստաբան Հովհաննես Խուդոյանը ներկայացրեց Արցախի Հանրապետության նախագահ Բակո Սահակյանի և Արցախի Հանրապետության երկրորդ նախագահ Արկադի Ղուկասյան անձնական երաշխավորությունը` Ռոբերտ Քոչարյանի խափանման միջոցի փոփոխման համար:
Նիստը նախագահող դատավոր Դավիթ Գրիգորյանը հայտնեց, որ երաշխավորները պետք է դատարան ներկայանան:
Պաշտպան Հայկ Ալումյանը հայտնեց, որ կճշտի, թե երբ Բակո Սահակյանը և Արկադի Ղուկասյանը կարող են ներկայանան դատարան:
Երաշխավորության վերաբերյալ քննարկումը հետաձգվեց:
