Երևանի ավագանին ապրիլի 23-ին կգումարի հերթական նիստը, որի ժամանակ կքննարկվի Մարշալ Բաղրամյան պողոտայի հ.26/1 հասցեում գտնվող Հանրապետության նախագահի նստավայրը «Հանրապետության տուն» անվանումով անվանակոչելու մասին որոշման նախագիծը:
Նախագծի հիմնավորման մեջ նշվում է, որ նման առաջարկություն Երևանի քաղաքապետարան է ներկայացվել ՀՀ նախագահի աշխատակազմի ղեկավարի կողմից:
Նշված գույքին Երևանի քաղաքապետի 08.04.2019թ. համար 1071-Ա որոշմամբ տրամադրվել է՝ Մարշալ Բաղրամյան պողոտա, համար 26/1 հասցեն:
ՀՀ նախագահական նստավայրը՝ Մաշտոցի պողոտա 47 հասցեում
Հանրապետության նախագահը և իր աշխատակազմը 2019 թվականի մարտի 1-ից Մաշտոցի պողոտայի համար 47 հասցեից տեղափոխվել են վերոգրյալ հասցեում գտնվող նախագահական նստավայրի վարչական շենք: Շենքում աշխատասենյակ է նախատեսվել նաև ՀՀ վարչապետի
համար, ինչպես նաև նրան ընձեռված է արարողակարգային նշանակության դահլիճներից օգտվելու հնարավորություն:
Հանրապետության նախագահի աշխատակազմը ծրագրում է Բաղրամյան պողոտայի համար 26/1 հասցեում գտնվող վարչական շենքի դահլիճներում, ինչպես նաև հարակից տարածքում իրականացնել մշակույթային միջոցառումներ, այդ թվում՝ համերգներ, ցուցահանդեսներ,
շնորհանդեսներ և այլն: Հաշվի առնելով նախագահական նստավայրի նկատմամբ առկա ծրագրերը և նպատակները, ինչպես նաև անվանակոչման արդյունքում դրա նշանակության վերաիմաստավորումը՝ նպատակահարմար է գտնվել անվանակոչման հարցը ներկայացնել Երևան քաղաքի ավագանու քննարկմանը:
