Դեկտեմբերի 19-ին տեղի ունեցավ Հայաստանի ՔՀԿ-ների հակակոռուպցիոն կոալիցիայի 3-րդ համաժողովը, որին մասնակցում էին Կոալիցիայի Երևանի և մարզային անդամ կառույցներից 36 ներկայացուցիչ:
Հայաստանի ՔՀԿ-ների հակակոռուպցիոն կոալիցիայի կառավարման խորհրդի նախագահ, Մարդկային զարգացման միջազգային կենտրոնի նախագահ Թևան Պողոսյանն իր ողջույնի խոսքում նշեց, որ այժմ լավ հնարավորություն է ստեղծվում կոռուպցիայի դեմ պայքարը համակարգային դաշտ բերելու համար:
Հայաստանի ՔՀԿ-ների հակակոռուպցիոն կոալիցիայի կառավարման խորհրդի նախագահ, Մարդկային զարգացման միջազգային կենտրոնի նախագահ Թևան Պողոսյան
«Նախկինում ունեցել ենք մի իրավիճակ, որ պետական համակարգն ինչ-որ չափով օրենքներ էր գրում, թղթի վրա տեքստեր էր հավաքում, որ այսպիսի, այնպիսի բաներ ենք արել, բայց երբևէ նորմալ չեն աշխատել: Վերջին 7 ամիսներին, երբ խոսում էին կոռուպցիայի դեմ պայքարի մասին, ավելի շատ տեսնում էինք պատժիչ կոմպոնենտը. օրենքի շրջանակներում տարբեր մարդկանց հետ կապված քրեական գործեր բացվեցին, քննություններ եղան, որոշ արդյունքներ տեսանք և այլն: Նոր հատուկ օրենքներ չեն մշակվել, կրթական ոլորտի հետ կապված նոր օրենքներ ևս չենք ունեցել, չի քննարկվել այնպիսի թեմա, ինչիպիսին է շահերի բախումը, չեն ներկայացվել էթիկայի տեսակետից որևէ նախաձեռնություններ: Ցանկանում եմ, որ 2019 թվականին կարողանանք ճիշտ մոտեցում ունենալ բոլոր ուղղություններով համակարգված, մասնակցային պայքարին»,-ասաց Թևան Պողոսյանը:
Իրավաբանների հայկական ասոցիացիայի նախագահ, Հայաստանի ՔՀԿ-ների հակակոռուպցիոն կոալիցիայի քարտուղարության համակարգող Կարեն Զադոյանը նշեց, որ երբ սկսվեցին աշխատանքները, որևէ մեկը չէր հավատում, որ նախկին իշխանությունների օրոք հնարավոր է ինչ-որ բարելավումների հասնել հակակոռուպցիոն կառուցակարգերի ստեղծման հետ կապված: «Այսօր մենք արդեն քրեական գոնե երկու գործերի շրջանակում տեսնում ենք ապօրինի հարստացման քրեականացումը կիրառված: Մենք դա պատկերացրել և արել ենք: Մենք վստահ ենք, որ այսօր պետք է տասնյակ գործեր լինեին, եթե մեր իրավապահ մարմիններն ունենային համապատասխան կարողությունները՝ ապօրինի հարստացման հոդվածը կիրառելու համար:
Իրավաբանների հայկական ասոցիացիայի նախագահ, Հայաստանի ՔՀԿ-ների հակակոռուպցիոն կոալիցիայի քարտուղարության համակարգող Կարեն Զադոյան
«Իմ քայլը» դաշինքն իր նախընտրական ծրագրում հստակ գրել է, որ պետք է ոչ միայն լինի օպերատիվ-հետախուզական, նախաքննության գործառույթ իրականացնող, այլև կրթական, կանխարգելիչ գործառույթներ: Վստահ ենք, շատ մոտ ժամանակներում մենք կունենանք այդ մարմինը»,-նշեց Կարեն Զադոյանը:
Համաժողովին ներկայացվեց Հայաստանի ՔՀԿ-ների հակակոռուպցիոն կոալիցիայի 21.07.2017-18.12.2018թթ. ժամանակահատվածի գործունեության հաշվետվությունը, հաստատվեց Կոալիցիայի 2019-2023 թվականների ռազմավարությունը:
Իրավաբանների հայկական ասոցիացիայի փորձագետներ Սյուզաննա Սողոմոնյանը, Մարիամ Զադոյանը, Մարատ Ատովմյանը ներկայացրեցին Հայաստանի ՔՀԿ-ների հակակոռուպցիոն կոալիցիայի 2019-2023 թվականների ռազմավարությունը և դրանում ներառված 4 ռազմավարական նպատակները, դրանց խնդիրները, գործողությունները, պատասխանատու անձնանց և կատարման ժամկետները։
Նույն օրը տեղի ունեցան նաև Հայաստանի ՔՀԿ-ների հակակոռուպցիոն կոալիցիայի կառավարման խորհրդի կազմի ընտրությունները: Կարեն Զադոյանը նշեց, որ, համաձայն Կոալիցիայի կանոնակարգի, Կոալիցիայի քարտուղարությունն ի պաշտոնե հանդիսանում է կառավարման խորհրդի անդամ։ Ուստիև, պետք է ընտրվեն 12 անդամ։
Ընտրության արդյունքների համաձայն՝ հաստատվեց Կոալիցիայի նոր կառավարման խորհուրդը: Կոալիցիայի խորհրդի կազմում են.
- «Իրավաբանների հայկական ասոցիացիա» ՀԿ, Կարեն Զադոյան
- «Մարդկային զարգացման միջազգային կենտրոն» ՀԿ, Թևան Պողոսյան
- «Աուդիո-Վիզուալ լրագրողների ասոցիացիա» ՀԿ, Արզուման Հարությունյան
- «Տարածքային զարգացման և հետազոտությունների կենտրոն» ՀԿ, Սաթիկ Բադեյան
- «Հայաստանի երիտասարդ բժիշկների ասոցիացիա» ՀԿ, Գևորգ Գրիգորյան
- Փոքր և միջին բիզնեսի հիմնադրամ, Գագիկ Պողոսյան
- Առաջատար տեխնոլոգիաների ձեռնարկությունների միություն, Կարեն Վարդանյան
- «Հայաստանի ՓՄՁ հաշվապահների ասոցիացիա» ՀԿ, Վահագն Համբարձումյան
- Կայուն զարգացման նախաձեռնությունների «Աստղացոլք» ՀԿ, Իրինա Հովհաննիսյան
- Գյումրու «Կանթեղ» Իրավապաշտպան ՀԿ, Արմեն Գաբրիելյան
- Հայաստանի համայնքների միություն, Էմին Երիցյան
- «Տնտեսական իրավունքի կենտրոն» ՀԿ, Մովսես Արիստակեսյան
- «Լրագրողները՝ հանուն մարդու իրավունքների» ՀԿ, Ժաննա Ալեքսանյան:
