ԱԱԾ տնօրեն Արթուր Վանեցյանի, ՀՔԾ պետ Սասուն Խաչատրյանի, ՀՀ վարչապետի պաշտոնակատար Նիկոլ Փաշինյանի հեռախոսային զրույցների գաղտնալսման վերաբերյալ Քննչական կոմիտեում գործը քննվում է, ինչի ավարտից հետո բոլոր հարցերի պատասխանները կտրվեն:
Այս մասին այսօր՝ դեկտեմբերի 15-ին, լրագրողների հետ հանդիպման ժամանակ ասաց Ազգային անվտանգության ծառայության տնօրեն Արթուր Վանեցյանը:
Նա նշել է, որ որևէ մեկը չէր կարող հիմնավորել, որ դա հենց իր խոսակցությունն է, բայց ասել է, որ դա հենց իր խոսակցությունն է: Արթուր Վանեցյանը նշում է, որ այդ խոսակցություններում չի ասվել խոսք, որի համար կարող է ամաչել: Նա համոզված է, որ առաջիկայում գաղտնալսում անողները կհայտնաբերվեն և կկրեն օրենքով իրենց հասնող պատիժը, իսկ եթե կլինի մի բան, որի համար պետք է ինքը պատասխան տա, ապա պատրաստ է:
Արթուր Վանեցյանի խոսքով, ինքը որևէ դատավորի հետ չի խոսել, իսկ եթե խոսել էր, ապա ինչու՞ այդ ձայնագրությունը չեն հրապարակել:
Նա նշեց, որ իր հեռախոսը տվել է անկախ փորձագետի, ով ամեն ինչ վերականգնել է, այդ թվում՝ Viber-ով, WhatsApp-ով կատարած զանգերը և չկա որևէ տեղեկություն, թե ինքը խոսել է որևէ դատավորի հետ։
