Երևանի ավագանու անդամ Արման Աբովյանը այսօր հրավիրված նիստի ընթացքում անդրադարձել է կարմիր գծերի խնդրին և նշել, որ նախ անհասկանալի է դրանց տրամաբանությունը` բացի բյուջեն լցնելու նպատակից:
Ավագանին քննարկում էր «Եվրոպա հյուրանոց» ՓԲԸ-ին Հանրապետության փողոցի՝ հ.38 հասցեի շենքին հարակից ճանապարհահատված և սահմանված պայմաններով շուրջօրյա ծառայողական ավտոկայանատեղի կազմակերպելու հարցը:
«Կոչ եմ անում վերացնել կարմիր գծերի համակարգը կամ հարցը վերանայել: Մեր խմբակցությունը դեմ է քվեարկելու այս նախագծին և կոչ եմ անում բոլորին դեմ քվեարկել: Առավել ևս, որ «Իմ քայլը» դաշինքից տեսնում եմ բազմաթիվ մարդկանց, որոնք ժամանակին շատ թեժ պայքարել են կարմիր գծերի դեմ»,-ասաց նա և նշեց, որ խոսքը երևույթի մասին է:
Քաղաքապետը հայտարարեց, որ իրենց խմբակցությունում այս մասին քննարկում են ունեցել և առաջարկել են, որ օր առաջ մշակվի մեխանիզմ, որը կգործի 2019 թվականից:
«Դա Երևանի ամբողջ կայանման համակարգը պետք է համակարգի: Այդ մեխանիզմը պետք է քննարկել այլ խմբակցությունների հետ և գալ ընդհանուր որոշման: Վստահ եմ, որ այդ որոշումը կթեթևացնի քաղաքը և ճիշտ, կոնկրետ լուծումներ կտա այս հարցում»,-ասաց նա:
Նշենք, որ որոշումն ընդունվեց:
