ՀՀ գլխավոր դատախազությունը ԱՊՀ Կոռուպցիայի հակազդման միջպետական խորհրդի գործունեության շրջանակում հայտարարել է Հայաստանում «Միասին ընդդեմ կոռուպցիայի» թեմայով սոցիալական հակակոռուպցիոն գովազդի երիտասարդական մրցույթ՝ հանդես գալով իբրև վերջինիս համակազմակերպիչ: Այս մասին հայտնում են դատախազությունից:
Մրցույթն անցկացվում է կոռուպցիայի՝ իբրև բացասական սոցիալական երևույթի դեմ պայքարում համատեղ արդյունավետ միջոցներ ձեռնարկելու, կոռուպցիայի ցանկացած դրսևորման նկատմամբ հասարակության անհանդուրժողական վերաբերմունքի ձևավորման ու ամրապնդման նպատակով:
Մրցույթի շրջանակում 14-ից մինչև 35 տարեկան մասնակիցները կարող են պաստառների և տեսանյութերի ձևաչափով պատրաստել «Միասին ընդդեմ կոռուպցիայի» թեմայով հակակոռուպցիոն սոցիալական գովազդ, որը պետք է արտացոլի հասարակության գործունեության՝ մասնակիցների համար նախընտրելի ոլորտներում կոռուպցիայի դեմ պայքարի անհրաժեշտության գաղափարը, այդ նպատակով պետության կողմից գործադրվող ժամանակակից մեխանիզմները կամ հակակոռուպցիոն պայքարում միջազգային համագործակցության դերն ու նշանակությունը:
Աշխատանքներն ընդունվում են www.anticorruption.life -ի պաշտոնական կայքում՝ մինչև 2018 թվականի հոկտեմբերի 19-ը:
Մրցույթի անցկացման կանոններին կարելի է ծանոթանալ ՀՀ գլխավոր դատախազության պաշտոնական կայքի (www.prosecutor.am) «Կոռուպցիայի դեմ պայքար» բաժնի «Միջազգային երիտասարդական մրցույթ /Միասին ընդդեմ Կոռուպցիայի/» ենթաբաժնում:
Հայաստանյան մասնակիցների կողմից ներկայացված աշխատանքների մրցույթի արդյունքները կիսաեզրափակիչ փուլում ազգային ժյուրիի կողմից կամփոփվեն հոկտեմբերի 19-ից մինչև նոյեմբերի 10-ը: Հայաստանից, Ռուսաստանի Դաշնությունից, Բելառուսից, Ղազախստանից, Ղրղզստանից և Տաջիկստանից ներկայացված լավագույն աշխատանքների մրցույթի վերջնական արդյունքները եզրափակիչ փուլում կամփոփեն միջազգային ժյուրիի կողմից:
Հաղթողների և մցանակակիրների մրցանակաբաշխության հանդիսավոր արարողությունը տեղի կունենա Մոսկվայում՝ կոռուպցիայի դեմ պայքարի միջազգային օրը՝ դեկտեմբերի 9-ին:
Մրցույթի համակազմակերպիչներն են նաև Ռուսաստանի Դաշնության, Բելառուսի Հանրապետության, Ղրղզստանի Հանրապետության գլխավոր դատախազությունները, Ղազախստանի Հանրապետության պետական ծառայության և կոռուպցիայի հակազդման գործակալությունը, Տաջիկստանի Հանրապետության պետական ֆինանսական վերահսկողության և կոռուպցիայի դեմ պայքարի գործակալությունը:
