Մայիսի 17-ին ՀՀ նախագահ Արմեն Սարգսյանը հրամանագիր է ստորագրել, որի համաձայն, վերաքննիչ քաղաքացիական դատարանի դատավոր Արսեն Մկրտչյանը նշանակվել է վերաքննիչ քաղաքացիական դատարանի նախագահ:

Իրավաբան.net-ը ներկայացնում է Արսեն Մկրտչյանի կենսագրությունը։

Ծնվել է 1973 թվականին, Երևան քաղաքում:

1993 թվականի հունիս ամսից մինչև 1994 թվականի դեկտեմբեր ամիսը ծառայել է ՀՀ զինված ուժերում:

1996 թվականին ավարտել է Երևանի «Գլաձոր» կառավարման համալսարանի միջազգային իրավունքի ֆակուլտետը:

2005թ. Նյու Յորք նահանգի դատական ինստիտուտ Դատական կառավարում, ԱՄՆ Նյու-Յորք:

2006-2007 Վարչական արդարադատություն. Դատավորի հմտություններ (Գերմանիա- Հայաստան):

2000 թվականից մինչև 2001 թվականն աշխատել է ՀՀ Տնտեսական գործերով վերաքննիչ դատարանում՝ որպես դատարանի նախագահի օգնական։

2001 թվականի ապրիլ ամսից աշխատել է նույն դատարանում՝ որպես գրասենյակի պետ։

2001 թվականից մինչև 2005 թվականն աշխատել է ՀՀ Տնտեսական դատարանում՝ որպես գրասենյակի պետ՝ միաժամանակ կատարելով դատարանի աշխատակազմի ղեկավարի պարտականությունները։

2002 թվականի փետրվար ամսին փոխադրման կարգով նշանակվել է դատարանի աշխատակազմի ղեկավարի պաշտոնում։

2005 թվականին նշանակվել է ՀՀ Վճռաբեկ դատարանի աշխատակազմի ղեկավարի պաշտոնում։

2005 թվականի սեպտեմբերից մինչև 2006 թվականի հունվարը պաշտոնավարել է նույն դատարանի աշխատակազմի ղեկավարի տեղակալի, ՀՀ Դատարանների նախագահների խորհրդի քարտուղարի պաշտոնում։

2006 թվականի հունվարի 4-ից փոխադրման կարգով նշանակվել է ՀՀ Վճռաբեկ դատարանի աշխատակազմի ղեկավարի տեղակալի, ՀՀ Դատարանների նախագահների խորհրդի և արդարադատության խորհրդի քարտուղարի պաշտոնում։

2006 թվականի սեպտեմբերից աշխատել է ՀՀ Վճռաբեկ դատարանի նախագահի խորհրդականի պաշտոնում։

2007 թվականից 2008 թվականն աշխատել է ՀՀ դատական դեպարտամենտի ղեկավարի պաշտոնում։

2008 թվականի օգոստոսի 6-ին ՀՀ Նախագահի հրամանագրով նշանակվել է ՀՀ վերաքննիչ քաղաքացիական դատարանի դատավոր:

2014 թվականի մայիսի 8-ին ՀՀ վարչապետի որոշմամբ նշանակվել է ՀՀ արդարադատության նախարարի տեղակալ:

2014 թվականի հունիսի 26-ին ՀՀ վարչապետի որոշմամբ նշանակվել է ՀՀ արդարադատության նախարարի առաջին տեղակալ:

2016 թվականի սեպտեմբերի 22-ին ՀՀ Նախագահի հրամանագրով նշանակվել է ՀՀ վերաքննիչ քաղաքացիական դատարանի դատավոր:

2014, 2017-2018թ. Եվրոպայի խորհրդի փորձագետ (ՀՀ քաղաքացիական դատավարություն, ՀՀ դատական օրենսգիրք, «Դատական դեպարտամենտում ծառայության մասին» ՀՀ օրենք, «Հաշտարարության մասին» ՀՀ օրենք):

2017թ.-ից Երևանի պետական Համալսարանի իրավագիտության ֆակուլտետի պետական քննական հանձնաժողովի անդամ:

2014-2016 թթ. ՀՀ կառավարության ներկայացուցիչ Միացյալ Ազգերի Կազմակերպության Միջազգային առևտրի հանձնաժողովի աշխատանքային խմբում (աշխատանքային խմբեր` Սնանկության իրավունք, Արբիտրաժ և վեճերի լուծման այլընտրանքային միջոցներ):

2014թ.-ից ՀՀ արդարադատության ակադեմիայում դասախոս (ՀՀ քաղաքացիական դատավարության օրենսգրքի արդի հարցերը, Իրավական մեկնաբանում):

2014թ.-ից ՀՀ փաստաբանական դպրոց դասախոս (Վերաքննությունը քաղաքացիական դատավարությունում):

2014-2018 թթ. ՀՀ արդարադատության նախարարության «Իրավաբանական ինստիտուտ» ՊՈԱԿ-ում դասախոս (վերապատրաստման դասընթացներ նոտարների համար- Կառուցվող շենքերի հետ կապված առուվաճառք, «Նոտարիատի մասին» ՀՀ օրենքի փոփոխությունների վերաբերյալ արդի հարցեր, Սնանկության և հարկադիր կատարման վարույթներում նոտարիատին վերաբերող առանձնահատկություններ):

2005–2014թթ. ՀՀ դատական դպրոցում վերապատրաստող (Դատական ծառայության դերը, իրավաբանական գիր ու գրագրություն, իրավական մեկնաբանում):

2014թ.ՀՀ-ում ֆրանսիական համալսարանի դասախոս (Սնանկության իրավունք):

2010-2011թթ. ArmLaw դատական ակտերի որոնողական համակարգի համահեղինակ:

2005-2008թթ. Դատական գործերի էլ. կառավարման համակարգի հեղինակ:

2001-2002թթ. Տնտեսական դատարանի գործերի էլ. կառավարման համակարգի հեղինակ:

1999թ. սեպտեմբերից մինչև 2000թ. նոյեմբեր Իրավատնտեսագիտական քոլեջի դասախոս (Քաղաքացիական իրավունք, Ընտանեկան իրավունք, Աշխատանքային իրավունք):

2007 թվականին ՀՀ Նախագահի կողմից շնորհվել է Հայաստանի Հանրապետության դատական ծառայության 1-ին դասի բարձրագույն խորհրդականի դասային աստիճան:

2015 թվականի դեկտեմբերի 28-ին ՀՀ Նախագահի հրամանագրով պարգևատրվել է «Մխիթար Գոշ» մեդալով:

Ամուսնացած է, ունի մեկ որդի և երկու դուստր: