Ազգային ժողովում մայիսի 1-ին հնչած ելույթներում անհարկի շահարկվել է Պետական եկամուտների կոմիտեի անունը, ինչի առնչությամբ կոմիտեն հորդորում է քաղաքական բոլոր ուժերին չքաղաքականացնել կառույցի գործունեությունը: ՊԵԿ-ն ապաքաղաքական կառույց է, որն անկախ քաղաքական գործընթացներից պարտավոր է և կատարում է օրենքով իրեն վերապահված պարտականությունները: Դրանց իրականացման որակից է կախված երկրի սոցիալական, տնտեսական անվտանգությունը: Եթե հարկային և մաքսային մարմինները թերանան իրենց գործառույթներն իրականացնելիս, հաշվի առնելով քաղաքական գործընթացները, մեր երկիրը խնդիր կունենա այս ոլորտներում:
Այս մասին տեղեկանում ենք ՊԵԿ տեղեկատվության և հասարակայնության հետ կապերի բաժնից։
Ուստի, հորդորում ենք քաղաքական բոլոր ուժերին չնսեմացնել ՊԵԿ-ի աշխատանքը և չմոռանալ, որ կոմիտեն վերջին շրջանում շարունակ ձեռքբերումներ է արձանագրում. ընթացիկ տարում գերակատարվել են պետբյուջեի հարկային եկամուտները, պարզեցվել են հարկային և մաքսային ընթացակարգերը, կրճատվել է դրանց համար ծախսվող ժամանակը, կատարելագործվել են սահմանին տնտեսական անվտանգության ապահովման մեխանիզմները, բիզնեսին շրջանառու միջոց ունենալու, ավտոմեքենայի ներմուծման հետ կապված մաքսային վճարումները նախապես հաշվարկելու, հարկային և մաքսային գործընթացները կանխատեսելու և քայլերը ծրագրելու հնարավորություններ են ընձեռվել:
Դուրս լինելով քաղաքական զարգացումներից՝ կոմիտեն պարտավոր է շարունակել կենտրոնացնել ջանքերը՝ իր գործառույթները բարեխղճորեն կատարելու համար, որպեսզի երկրում չլինեն աշխատավարձի, կենսաթոշակի, առողջապահական ծառայությունների, բիզնեսին ԱԱՀ-ի վերադարձման և պետության ու քաղաքացիների կենսագործունությանն առնչվող այլ խնդիրներ:
