Սերժ Սարգսյանը մարտի 21-ին ստորագրել է «Անվտանգության խորհրդի կազմավորման և գործունեության մասին» ՀՀ օրենքը: Այն ուժի մեջ կմտնի ապրիլի 9-ին:
Անվտանգության խորհուրդը, Սահմանադրության 155-րդ հոդվածի 2-րդ մասին համապատասխան, սահմանում է պաշտպանության ոլորտի քաղաքականության հիմնական ուղղությունները:
Անվտանգության խորհուրդը վարչապետի առաջարկությամբ քննարկում է Հայաստանի Հանրապետության անվտանգությանը, տարածքային ամբողջականությանը և սահմանների անձեռնմխելիությանը վերաբերող հարցեր:
Անվտանգության խորհուրդը պաշտպանության ոլորտի քաղաքականության հիմնական ուղղություններին վերաբերող հարցերով ընդունում է որոշումներ, իսկ իր իրավասության մեջ մտնող այլ հարցերով` խորհրդատվական բնույթի որոշումներ:
Անվտանգության խորհրդի անդամներն են`
- վարչապետը.
- առաջին փոխվարչապետը.
- փոխվարչապետները.
- Անվտանգության խորհրդի քարտուղարը.
- պաշտպանության նախարարը.
- արտաքին գործերի նախարարը.
- ազգային անվտանգության ծառայության տնօրենը.
- ոստիկանության պետը.
- զինված ուժերի գլխավոր շտաբի պետը:
Նշենք, որ Անվտանգության խորհրդի` պաշտպանության ոլորտի քաղաքականության հիմնական ուղղություններին վերաբերող հարցերով որոշումներն ընդունվում են Անվտանգության խորհրդի առնվազն յոթ անդամների ձայներով, իսկ խորհրդատվական բնույթի որոշումները` Անվտանգության խորհրդի նիստին ներկա անդամների ձայների մեծամասնությամբ:
Իսկ Անվտանգության խորհրդի որոշումներն ստորագրում է վարչապետը:
Հավելենք նաև, որ Անվտանգության խորհրդի խորհրդատվական բնույթի որոշումները քննարկվում են իրավասու մարմիններում, և դրանցում ամրագրված լուծումներն ըստ անհրաժեշտության կենսագործվում են այդ մարմինների կողմից ընդունվող իրավական ակտերում:
