ՀՀ քաղաքացու անձնագիր տալու կամ փոխանակելու վճարովի ծառայությունների մատուցումից 2017թ-ի ընթացքում փաստացի մուտքագրվել է 606.1 մլն դրամ, որը տարեկան ծրագրային 620.0 մլն. դրամից պակաս է 13.9 մլն. դրամով կամ 2.2%-ով:
Այս մասին ասվում է մարտի 22-ին կառավարության նիստին քննարկվելիք նախագծի մեջ։
Նախագծով նախատեսվում է փոփոխություններ կատարել ոստիկանության «ՀՀ քաղաքացու անձնագիր տալու կամ փոխանակելու վճարովի ծառայություն» ծրագրի արտաբյուջետային հաշվի միջոցների ծախսման 2018 թվականի նախահաշիվը հաստատելու, ՀՀ 2018թ-ի պետական բյուջեում և ՀՀ կառավարության 2017թ-ի դեկտեմբերի 28-ի N 1717-Ն որոշման մեջ։
Նշվում է, որ փոփխության անհրաժեշտությունը հիմնականում պայմանավորված է տրվող անձնագրերի ընդհանուր թվաքանակում կենսաչափական անձնագրերի թվի նվազման և դրա փոխարեն սովորական անձնագրերի թվի ավելացման հանգամանքով: Խնդիրը կայանում է նրանում, որ սովորական նմուշի անձնագրերի տրամադրման ժամկետը դիմելու 5-րդ աշխատանքային օրն է, իսկ կենսաչափական փաստաթղթերինը՝ 15-րդ: Բացի այդ առկա է պետական տուրքերի զգալի տարբերություն (առաջին դեպքում՝ 1.0 հազ. դրամ, մյուս դեպքերում՝ 25.0 հազ. դրամ և 3.0 հազ. դրամ) : Հետևաբար՝ ՀՀ քաղաքացիները համապատասխան օրենսդրական փոփոխությունից հետո (2016թ.-ի օգոստոս) ավելի հաճախ սկսեցին դիմել սովորական նմուշի անձնագրեր ստանալու համար: Արդույնքում կրճատվեց կենսաչափական փաստաթղթերն արագացված ստանալու համար (հատկապես 5-րդ աշխատանքային օրը) դիմող քաղաքացիների թիվը:
Հաշվի առնելով վերոնշյալը, ինչպես նաև այն, որ տվյալ բնագավառում 2018 թվականին օրենսդրական փոփոխություն չի նախատեսվում՝ նշված ծառայություններից մուտքերի 2018թ.-ի ծրագրային ցուցանիշը նախատեսվում է սահմանել 580.0 մլն դրամի չափով, որը 2017 թվականի փաստացի մուտքերից պակաս է 26.1 մլն. դրամով կամ 4.3 %-ով: Հաշվարկի համար հիմք են հանդիսանում ըստ առանձին ծառայությունների տեսակներից օգտվողների տարեկան թիվը (շուրջ 40000 անձ), դրա կառուցվածքային կանխատեսվող փոփոխություններն ու ծառայությունների վճարների չափերը:
ՀՀ ոստիկանության անձնագրային և վիզաների վարչության արտաբյուջետային միջոցների 2018թ.-ի մուտքերի ծրագրային ցուցանիշների վերաբերյալ տեղեկանքը կցվում է:
ԱՎՎ 2018թ.-ի արտաբյուջետային միջոցների տարեկան ելքը (ծախսերը) նախատեսվում է սահմանել 560.9 մլն. դրամի չափով: Այն 2017թ.-ի փաստացի ծախսերի՝ 626.1 մլն. դրամ ծրագրային ցուցանիշից պակաս է 65.2 մլն. դրամով կամ 10.4 %-ով, պայմանավորված կապիտալ բնույթի որոշակի հատկացումները մնացորդում արտացոլելու հանգամանքով:
Այսպես, Նախագծով նախատեսվող 19.1 մլն. դրամ հավելուրդը 2017թ. տարեվերջի 80.9 մլն. դրամ մնացորդի հետ միասին, ընդամենը 100.0 մլն դրամ, որից 70.0 մլն. դրամը նախագծանախահաշվային փաստաթղթերի առկայության դեպքում ուղղվելու է ԱՎՎ Շենգավիթի, Վաղարշապատի և Կապանի անձնագրային ստորաբաժանումների վարչական շենքերի կապիտալ վերանորոգման աշխատանքների գծով ծախսերի ֆինանսավորմանը (հիմք ընդունելով «Գնումների մասին» ՀՀ օրենքի 14-րդ հոդվածի 5-րդ մասը), իսկ 30 մլն դրամը՝ ՀՀ ոստիկանության հակակոռուպցիոն ռազմավարության 2018թ. ծրագրի շրջանակներում ԱՎՎ տարածքային անձնագրային ստորաբաժանումներում հերթերի կարգավորման համակարգերի ներդրմանը:
Ընդամենը ծախսերի 78.0%-ը, գումարով՝ 437.4 մլն. դրամ բաժին է ընկնում ընթացիկ, իսկ 22.0%-ը, գումարով՝ 123.5 մլն դրամ` կապիտալ ծախսերին:
Ընդամենը ծախսերի 52.1%-ը, գումարով 292.0 մլն. դրամ, նախատեսվում է օգտագործել սոցիալական ապահովության, իսկ 47.9%-ը, 268.9 մլն դրամ` ՀՀ ոստիկանության ԱՎՎ գործունեության ապահովման ընթացիկ և տեխնիկական վերազինման ծախսերի ֆինանսավորման նպատակներով:
ՀՀ ոստիկանության ԱՎՎ արտաբյուջետային միջոցների 2018թ.-ի մուտքերի ծրագրային ցուցանիշների վերաբերյալ
| Ծառայության անվանումը | Վճարիչափը /դրամ/ |
2017թ. փաստացի |
2018թ. կանխատեսվող | ||
| քանակը | մուտքերը /հազ. դրամ/ | քանակը | մուտքերը /հազ. դրամ/ | ||
| ՀՀ քաղաքացու կորած անձնագրի փոխարեն նոր անձնագիրը մեկ աշխատանքային օրվա ընթացքում տալու ծառայություն | 60000 | 777 | 46.620,0 | 750 | 45.000,0 |
| ՀՀ քաղաքացու կորած անձնագրի փոխարեն նոր անձնագիրը 3-րդ աշխատանքային օրը տալու ծառայություն | 50000 | 405 | 20.250,0 | 380 | 19.000,0 |
| ՀՀ քաղաքացու կորած անձնագրի փոխարեն նոր անձնագիրը 5-րդ աշխատանքային օրը տալու ծառայություն | 40000 | 705 | 28.200,0 | 680 | 27.200,0 |
| Մեկ աշխատանքային օրվա ընթացքում ՀՀ քաղաքացու անձնագիր տալու կամ փոխանակելու ծառայություն | 20000 | 12881 | 257.620,0 | 12600 | 252.000,0 |
| ՀՀ քաղաքացու անձնագիրը 3-րդ աշխատանքային օրը տալու կամ փոխանակելու ծառայություն | 10000 | 9751 | 97.510,0 | 9000 | 90.000,0 |
| Կորած նույնականացման քարտի փոխարեն նոր նույնականացման քարտը մեկ աշխատանքային օրվա ընթացքում տալու ծառայություն | 40000 | 30 | 1.200,0 | 30 | 1.200,0 |
| Կորած նույնականացման քարտի փոխարեն նոր նույնականացման քարտը 3-րդ աշխատանքային օրը տալու ծառայություն | 20000 | 160 | 3.200,0 | 150 | 3.000,0 |
| Մեկ աշխատանքային օրվա ընթացքում նույնականացման քարտ տալու կամ փոխանակելու ծառայություն | 20000 | 1596 | 31.920,0 | 1480 | 29.600,0 |
| Նույնականացման քարտը 3-րդ աշխատանքային օրը տալու կամ փոխանակելու ծառայություն | 10000 | 1476 | 14.760,0 | 1400 | 14.000,0 |
| ՀՀ պետական սահմանի անցակետերում օտարերկրյա պետություններում անձնագրի վավերականության ժամկետի մասին նշում կատարելու ծառայություն | 10000 | 6647 | 66.470,0 | 6200 | 62.000,0 |
| ՀՀ քաղաքացու անձնագիրը (կենսաչափական տվյալներով) 5-րդ աշխատանքային օրը տալու կամ փոխանակելու ծառայություն | 5000 | 2095 | 10.475,0 | 2000 | 10.000,0 |
| Նույնականացման քարտը 5-րդ աշխատանքային օրը տալու կամ փոխանակելու ծառայություն | 5000 | 5566 | 27.830,0 | 5400 | 27.000,0 |
| ԸՆԴԱՄԵՆԸ | x | 42089 | 606.055,0 | 40070 | 580.000,0 |
