Պատգամավոր Գալուստ Սահակյանը, Կարինե Աճեմյանը, Ալիկ Սարգսյանը, Ռուզաննա Մուրադյանը, Ռաֆիկ Գրիգորյանը, Հակոբ Բեգլարյանը, Ֆելիքս Ցոլակյանը նոր նախագիծ են ներկայացրել Ազգային ժողովի պետական-իրավական և մարդու իրավունքների պաշտպանության հանձնաժողով:
Պատագամավորները ներկայացված նախագծով առաջարկում են քրեական դատավարության 258-րդ հոդվածը փոփոխության ենթարկել:
«1. Քննիչը տուժողին, քաղաքացիական հայցվորին, քաղաքացիական պատասխանողին և նրանց ներկայացուցիչներին, ինչպես նաեւ սույն օրենսգրքի 31-րդ հոդվածի 1-ին մասի 4-րդ եւ 5-րդ մասերով նախատեսված դեպքերում՝ մեղադրյալին և նրա պաշտպանին ուղարկում է քրեական գործով վարույթը կասեցնելու մասին որոշման պատճենը՝ պարզաբանելով որոշման բողոքարկման կարգը»:
Փոփոխություն է առաջարկվում նաև 262-րդ հոդվածում:
«1. Քննիչը կասկածյալին, մեղադրյալին, պաշտպանին, ինչպես նաեւ տուժողին, նրա ներկայացուցչին, քաղաքացիական հայցվորին, քաղաքացիական պատասխանողին կամ նրանց ներկայացուցիչներին, ինչպես նաեւ այն ֆիզիկական անձի կամ իրավաբանական անձի ներկայացուցչին, որոնց հայտարարության հիման վրա հարուցվել է քրեական գործը, ուղարկում է քրեական գործով վարույթը կարճելու և քրեական հետապնդումը դադարեցնելու մասին որոշման պատճենը՝ պարզաբանելով գործի նյութերի հետ ծանոթանալու նրանց իրավունքը եւ որոշման բողոքարկման կարգը»:
Եվգենյա Համբարձումյան
