Երևանի ավագանու «Երկիր ծիրանի» խմբակցության անդամները այսօր՝ փետրվարի 13-ին, ավագանու նիստի ժամանակ ծծմբական թթու էին բերել նիստերի դահլիճ:
«Շատ սուր հոտ ուներ, խեղդվում էինք այդ հոտից: Հետո մոտեցան քաղաքապետ Տարոն Մարգարյանին ու վիճաբանություն սկսվեց, բանկաները ջարդվեցին: Հիմա փորձում են դահլիճը մաքրել, որովհետև սարսափելի վիճակ է»,- այս մասին Իրավաբան.net-ի հետ զրույցում նշեց ավագանու «Ելք» խմբակցության անդամ Անի Սամսոնյանը:
Նրա խոսքով, տարանների մեջ ծծմբական թթու է եղել՝ միախառնված տիղմի հետ: Այն բերվել է Նուբարաշեն վարչական շրջանից:
Նրանք այսպիսի կոչեր են հնչեցրել. «Այս գարշահոտության մեջ մարդիկ են ապրում, դուք էլ զգացեք այս հոտը»:
«Մեր ինքնազգացողությունը վատացավ, մենք դուրս եկանք: Այս պահին փորձում են դահլիճը մաքրել, որպեսզի նիստը շարունակենք, բայց պարզ է, որ այդ հոտը դահլիճից դուրս չի գալու: Այս պահին «Երկիր ծիրանիի» անդամները անվտանգության աշխատակիցների հետ ներսում են»,- նշեց Անի Սամսոնյանը:
