Կառավարության նախաձեռնությամբ 2018 թվականի փետրվարի 6-ին գումարված արտահերթ նիստին կքննարկվի հանրային խորհրդի մասին օրենքի նախագիծը:
Նշենք, որ հանրային խորհրդի գործունեությունը հիմնված է անձանց, այդ թվում` հասարակական կազմակերպությունների, սփյուռքի ներկայացուցիչների կամավոր մասնակցության սկզբունքի վրա:
Հանրային խորհուրդը հիմնականում զբաղվում է հասարակության տարբեր շերտերի շահերի ներկայացմամբ, քաղաքացիական հասարակության զարգացմամբ, կառավարության, պետական կառավարման համակարգի մարմինների և քաղաքացիական հասարակության ինստիտուտների միջև փոխադարձ վստահության, երկխոսության և գործընկերային հարաբերությունների ձեւավորմանը նպաստելով:
Խորհուրդը զբաղվում է նաև հանրային նշանակություն ունեցող հարցերի, այդ թվում` օրենքների և այլ նորմատիվ իրավական ակտերի, պետական ծրագրերի, ռազմավարությունների, հայեցակարգերի և դրանց նախագծերի վերաբերյալ հասարակական կարծիքի բացահայտմամբ:
Հանրային խորհուրդը կազմված կլինի 45 անդամից: Հանրային խորհրդի անդամ կարող է լինել 25 տարին լրացած, պետությանը կամ հասարակությանը ծառայություններ մատուցած, հանրային կամ իր մասնագիտական ոլորտում հեղինակություն վայելող, ինչպես նաև հանրային խորհրդի առջև դրված խնդիրների կենսագործման համար անհրաժեշտ հմտություններ ունեցող յուրաքանչյուր անձ: Հանրային խորհրդին կից գործում են 15 ոլորտային մշտական հանձնաժողովներ:
Կառավարության կազմավորումից հետո 30-օրյա ժամկետում պետք է ստեղծվի նաև հանրային խորհուրդը:
Առանձին հարցերի քննարկման, այդ թվում` հասարակական փորձաքննություն իրականացնելու համար և դրանց վերաբերյալ հանրային խորհրդի որոշումների նախապատրաստման նպատակով` հանրային խորհուրդը, ներգրավելով մասնագետների, կարող է ձեւավորել ժամանակավոր հանձնաժողովներ և աշխատանքային խմբեր:
Խորհրդի նիստերը հրավիրվում են ոչ պակաս, քան երկու ամիսը մեկ անգամ: Նոր ձևավորված խորհրդի առաջին նիստը գումարվում է ոչ ուշ, քան հանրային խորհրդի ձևավորումից 10 օր հետո:
Խորհրդի նիստերն իրավազոր են, եթե դրանց մասնակցում են անդամների ընդհանուր թվի կեսից ավելին:
Հանրային խորհրդի արտահերթ նիստերը հրավիրում է հանրային խորհրդի նախագահը: Հանրային խորհրդի նիստերը դռնբաց են, եթե Հանրային խորհուրդը նիստերը դռնփակ անցկացնելու մասին որոշում չի կայացնում:
Հանրային խորհրդի նախագահը յուրաքանչյուր տարի` մինչև փետրվարի 15-ը, հաշվետվություն է ներկայացնում կառավարությանը` խորհրդի նախորդ տարվա գործունեության մասին` զուգահեռաբար այն հրապարակելով խորհրդի պաշտոնական համացանցային կայքում:
Վերջին մեկ տարվա ընթացքում անհարգելի պատճառով խորհրդի նիստերին չմասնակցած անդամը հեռացվում է խորհրդից:
Հանրային խորհրդի անդամի լիազորությունները դադարում են, եթե`
1) նա այդ մասին դիմում է ներկայացրել.
2) դատարանի` օրինական ուժի մեջ մտած վճռի հիման վրա ճանաչվել է անգործունակ, սահմանափակ գործունակ, անհայտ բացակայող կամ մահացած.
3) նրա նկատմամբ կայացվել է դատարանի` օրինական ուժի մեջ մտած դատավճիռ, որով նա դատապարտվել է դիտավորյալ հանցագործության համար կամ որով նախատեսվում է ազատությունից զրկում.
4) Կառավարության պաշտոնական համացանցային կայքում հրապարակվել է վարչապետի` սույն օրենքի 5-րդ հոդվածի 10-րդ մասով նախատեսված գրավոր հայտարարությունը.
5) մահացել է:
Հանրային խորհրդի գործունեությունն ապահովում է նրա քարտուղարությունը, որը վարչապետի աշխատակազմի առանձնացված ստորաբաժանում է: Քարտուղարության կանոնադրությունը և հաստիքացուցակը հաստատում է վարչապետը:
Խորհրդի ֆինանսավորումն իրականացվում է վարչապետի աշխատակազմի միջոցով` պետական բյուջեով նախատեսված ծախսերի շրջանակներում:
