Իրավական ակտերի նախագծերի հրապարակման միասնական կայքում աշխատանքի և սոցիալական հարցերի նախարարությունը ներկայացրել նոր նախագիծ, որով առաջարկվում է Վանաձորի երեխաների խնամքի և պաշտպանության N 1 գիշերօթիկ հաստատությունը վերակազմավորել «Լոռու մարզի երեխայի և ընտանիքի աջակցության կենտրոն» հիմնադրամի:
Հիմնադրամը դառնալու է գիշեօթիկ հաստատության իրավահաջորդը և դրան են փոխանցվելու վերակազմավորված իրավաբանական անձի իրավունքներն ու պարտականությունները:
Որոշումն ուժի մեջ մտնելու օրվանից կդադարեցվի շուրջօրյա խնամքի տրամադրման նպատակով երեխաների ընդունելությունը Վանաձորի երեխաների խնամքի և պաշտպանության N 1 գիշերօթիկ հաստատություն:
Նախագծով առաջարկվում է նաև հիմնադրամի տնօրենի ժամանակավոր պաշտոնակատար նշանակել Հասմիկ Ներկարարյանին, ով ներկայումս գիշերօթիկի տնօրենն է:
Մինչև գործընթացի ավարտը կգնահատվեն Վանաձորի երեխաների խնամքի և պաշտպանության N 1 գիշերօթիկ հաստատությունում խնամվող երեխաների կարիքները և կկազմակերպվի նրանց վերադարձը կենսաբանական կամ խնամակալի (հոգաբարձուի) ընտանիք:
