«Ելք» խմբակցությունը ԱԺ պետական-իրավական և մարդու իրավունքների պաշտպանության հարցերի մշտական հանձնաժողովի այսօրվա նիստի ընթացքում ներկայացրեց ԱԺ որոշման նախագիծ՝ հիմք ընդունելով պատգամավոր Նիկոլ Փաշինյանի հայտարարությունը , որ ԱԺ ՀՀԿ խմբակցության պատգամավոր Արտաշես Գեղամյանը 2017 հոկտեմբերի 5-ին խորհրդարանի միջանցքում բռունցքներով հարձակվել է իր վրա։
Առաջարկվում է ստեղծել 11 անդամից բաղկացած հանձնաժողով՝ դեպքը քննելու համար:
Որոշման նախագծի մեջ նշված է. «- Ստեղծել ժամանակավոր հանձնաժողով պատգամավոր Արտաշես Գեղամյանի կողմից 2017թ. հոկտեմբերի 5-ին պատգամավորական էթիկայի կանոնները խախտելու վերաբերյալ Ազգային ժողով եզրակացություն ներկայացնելու համար։
Հանձնաժողովն իրավասու է քննել ԱԺ ԵԼՔ խմբակցության ղեկավար, պատգամավոր Նիկոլ Փաշինյանի հայտարարությունն այն մասին, որ ԱԺ ՀՀԿ խմբակցության պատգամավոր Արտաշես Գեղամյանը 2017 հոկտեմբերի 5-ին ԱԺ միջանցքում բռունցքներով հարձակվել է իր վրա։
Հանձնաժողովն ունի 11 անդամ, որոնցից վեցին նշանակում է «Հայաստանի Հանրապետական կուսակցություն» խմբակցությունը, երեքին՝ «Ծառուկյան» խմբակցությունը և մեկական՝ «Հայ Յեղափոխական Դաշնակցություն» և «Ելք» խմբակցությունները:
Հանձնաժողովը կազմավորված է համարվում նրա անդամների կեսից ավելիի նշանակման և Հանձնաժողովի կազմն Ազգային ժողովի նախագահի կողմից հաստատվելու օրը:
Հանձնաժողովի առաջին նիստը գումարվում է նրա կազմավորման օրվան հաջորդող առաջին երկուշաբթի օրը՝ ժամը 11-ին: Հանձնաժողովի նախագահի և նրա տեղակալի ընտրության վերաբերյալ Հանձնաժողովի որոշումները 24 ժամվա ընթացքում ներկայացվում են Ազգային ժողովի նախագահին:
Ազգային ժողովի աշխատակազմն ապահովում է Հանձնաժողովի գործունեության համար անհրաժեշտ պայմաններ: Հանձնաժողովի գործունեության մասնագիտական սպասարկումն իրականացնում է Ազգային ժողովի աշխատակազմի իրավասու փորձագետը (մասնագետը):
Հանձնաժողովի գործունեության ժամկետը մինչեւ 2017 թվականի ապրիլի 1-ն է»:
Հանձնաժողովի նախագահ Հրայր Թովմասյանին հետաքրքրում էր՝ բռունցքներով հարձակվելը էթիկայի խախտո՞ւմ է, թե՞ ոչ:
«Որևէ տեղ սահմանված չէ, որ բռունցքներով հարձակվելն էթիակայի խախտում է», – նկատեց պատգամավորը։
Նրա խոսքով՝ կատարվածը երկու չափահաս անձանց միջև տեղի ունեցած միջադեպ է և պետք չէ խորհրդարանում նման հարց քննարկել։
«Նման խնդիրները պետք է լուծվեն այլ ընթացակարգերով, որոնք իրավական լուծում չունեն: Իսկ նախագծին վերը նշված շարադրմամբ տրվելու է բացասական եզրակացություն», – ասաց նա:
Քվեարկության ժամանակ նախագծին կողմ էր միայն Էդմոն Մարուքյանը։
