Չի կարելի գումարով սահմանադրական պարտականությունից ազատվել և համարել, որ ամեն ինչ նորմալ է: Ազգային ժողովում «Զինվորական ծառայության եւ զինծառայողի կարգավիճակի մասին» ՀՀ օրենքի նախագծի քննարկման ժամանակ Պաշտպանության նախարար Վիգեն Սարգսյանը նշեց, որ նա որպես նախարար դեմ է դրան:
Նրա խոսքով՝ օրենքի խախտմամբ զինվորական ծառայություն չանցածները, եթե անգամ դրա համար վճարել են, բայց օրենքը խախտել են, չեն կարող ընդունվել հանրային ծառայության. «Ես բավականին ճկուն եմ քաղաքականություն մշակելիս»:
Պատասխանելով «Ելք» խմբակցության պատգամավոր Արարատ Միրզոյանի հարցին, թե արդյոք պատրաստ է գնալ փոխզիջումների, ընդդիմության ձայնը լսելու. «Ավելի վաղ նշել եք, որ ավելի լավ է կոնսենսուսով ընդունվեն այս նախագծերը, ինձ հետաքրքիր է այդ կոնսենսուսին հասնելու համար որքա՞ն է ձեր անձնական դիրքորոշումը՝ փոխզիջումային, որովհետեւ կան դետալներ, որոնց ընդդիմության ներկայացուցիչները դեմ են»,-ասաց նա:
Ի պատասխան Վիգեն Սարգսյանը նշեց, որ հանրային քննարկումների նպատակը հենց դա է եղել՝ լսել ընդդիմության կողմից հնչեցված առաջարկները:
«Ես չեմ հիշում, որ հանդիպումների, քննարկումների ժամանակ ձեր հնչեցրած որեւէ հարց ներառված չլինեն այս նախագծում: Ես բավականին ճկուն եմ քաղաքականություն մշակելիս, չի եղել առաջարկ, որը մանրամասն չի քննարկվել: Այս օրենքների ընդունմամբ ձեւավորում ենք իրավական դաշտը, ծառայություն անցնելու պայմանները կառավարության կողմից կսահմանվեն: Քաղաքականությունն այս է՝ պետք է ծառայեն բոլորը, բարձրագույն կրթություն ունեցող, գիտական ներուժ ունեցող մարդը կարող է որպես սպա ծառայել, իսկ ով ուզում է շարքային ծառայություն անցնել, կարող է ծառայել երկու տարի»,-ասաց նա:
