Երևանի քաղաքապետ Տարոն Մարգարյանի հանձնարարությամբ՝ սեպտեմբերի 16-ը հայտարարվել էր համաքաղաքային շաբաթօրյակ, որին մասնակցել են Երևանի քաղաքապետարանի աշխատակազմի, վարչական շրջանների աշխատակազմերի, քաղաքապետարանի ենթակայության կառույցների, պետական ու մասնավոր կազմակերությունների աշխատակիցներ, ընդհանուր առմամբ՝ 14.900 անձ:
Այս մասին տեղեկացնում են Երևանի քաղաքապետարանի տեղեկատվության և հասարակայնության հետ կապերի վարչությունից:
Անկախության տոնին ընդառաջ հայտարարված համաքաղաքային շաբաթօրյակի ընթացքում Երևանի բոլոր վարչական շրջաններում իրականացվել են լայնածավալ սանմաքրման աշխատանքներ: Պատշաճ տեսքի են բերվել հանրային օգտագործման տարածքները՝ բակերը, այգիները, պուրակները, անտառային տարածքները, պողոտաներին, փողոցներին, հրապարակներին, դպրոցներին, ինչպես նաև հանրային նշանակության այլ կառույցներին հարակից տարածքները:
Շաբաթօրյակի բոլոր մասնակիցներն ապահովված են եղել ձեռնոցներով, պարկերով, բահերով, փոցխերով և անհրաժեշտ այլ պարագաներով: Առավել դժվարամատչելի տեղանքների մաքրման համար օգտագործվել է ծանր տեխնիկա՝ ինքնաթափեր, ամբարձիչներ, կռունկներ, ջրցան մեքենաներ և այլն:
Երևանի քաղաքապետարանի աշխատակազմի կոմունալ տնտեսության վարչության տվյալներով՝ շաբաթօրյակի ընթացքում սանմաքրման աշխատանքներում ներգրավված է եղել ընդհանուր առմամբ 74 միավոր տարբեր նշանակության տեխնիկա, աղբավայր է տեղափոխվել շուրջ 340 տոննա աղբ:
![](https://www.yerevan.am/uploads/media/news_gallery/0001/70/161442cd3f250e5148e10e22f2db88f685a7385c.jpeg)
![](https://www.yerevan.am/uploads/media/news_gallery/0001/70/0a4acd17ed346bbad26d4c15442bc8037b0d10fb.jpeg)
![](https://www.yerevan.am/uploads/media/news_gallery/0001/70/0e7953d469bbc4e5bf27940b7b42b1dc323b6a32.jpeg)