Երևան – «Զվարթնոց» օդանավակայան փորձնական երթուղին նոր է, ուղևորները՝ դեռևս քիչ։
Երևանի Հանրապետության հրապարակից «Զվարթնոց» օդանավակայան ուղևորվող ավտոբուսն այսօր թերևս ամենաշատ ուղևորներ ունեցել է առավոտյան՝ 10։00-ին, դեպի օդանավակայան են ուղևորվել ՀՀ տրանսպորտի, կապի և տեղեկատվական տեխնոլոգիաների նախարարը, աշխատակիցներն ու լրագրողները։
Դրանից հետո ուղորների պակաս է նկատվում, 13։00-ին՝ հերթական ուղևորահոսքին սպասում էր մեկ կին։ Նա մինչ այս տեղեկացել էր նախարարությունից նոր երթուղու մասին և ժամանել Հանրապետության հրապարակ։ Միակ ուղևորը գոհ էր նախաձեռնությունից, ասում էր՝ դրական է, երբ հստակ ժամով է ընթանում տրանսպորտը, առավել ևս երբ խոսքը գնում է օդանավակայան գնացող երթուղայինի մասին։
Նոր երթուղու ավտոբուսի վարորդը համաձայնեց՝ դեռևս ուղևորները քիչ են, ինչը տրամաբանական է, քանի որ ընդամենն այսօր է երթուղին գործարկվել։
ՀՀ տրանսպորտի, կապի և տեղեկատվական տեխնոլոգիաների նախարարությունից մեզ տեղեկացրեցին, որ Երևան – «Զվարթնոց» օդանավակայան փորձնական երթուղին ընդամենը երկու կանգառ է կատարելու՝ Մաշտոցի պողոտայի «Փակ շուկայի» կանգառում և Կենտրոնական ավտոկայանի տարածքում:
Փոխադրավարձը մեկ ուղևորի համար 300 դրամ է։ Փոխանցում են նաև, որ երթուղին գործելու է յուրաքաչյուր կլոր ժամը մեկ՝ 24 ժամ անընդմեջ։
