Այսօր կառավարության հերթական նիստին վարչապետ Կարեն Կարապետյանը մինչ օրակարգային հարցերին անցնելը մի շարք հանձնարարականներ տվեց:
Նա հայտարարեց, որ մեկնարկում են «Մաքուր Հայաստան» ծրագիրը. թե տեղացիների և թե զբոսաշրջիկների համար գրավիչ է մաքուր այգիներ, ճանապարհներ և համայնքային այլ վայրեր ունենալը: Այս իսկ նպատակով տարածքային կառավարման նախարար Դավիթ Լոքյանին հանձնարարվեց 2 ամվսա ընթացքում ներկայացնել ծրագրի հայեցակարգը, որ կներառի նաև գործողությունների պլանը, ժամանակացույցը:
Այնուհետև հայեցակարգը կներկայացնի հանրային քննարկման:
Երկրորդ հանձնարարականը վերաբերում էր օտարերկացիների կողմից Հայաստանի մուտքի արտոնագրեր ստանալու ընթացակարգում խոչընդոտներից վերացմանը: Ոստիկանությանը հանձնարարվեց 1 շաբաթվա ընթացքում ներկայացնել որոշման նախագիծ՝ կառավարության 1268-Ն որոշման մեջ համապատասխան փոփոխություն կատարելու վերաբերյալ, որով կվերացնի սահմանային կետերում դիմում-հարցաթերթիկներ լրացնելու պահանջը:
Հանձնարարվեց նաև ֆինանսների նախարարին քննարկում կազմակերպել՝ մուտքի արտոնագրային վճարները անկանխիկ տարբերևակով գանձելու հնարավորության վերաբերյալ:
Երրորդ հանձնարարականը վերաբերում էր շենքային տարածքների արդյունավետ օգտագործմանը: Վարչապետը նշեց, որ պետական կազմակերպությունների կողմից փաստացի զբաղեցված շենքային տարածքները ոչ բոլոր դեպքերում են համապատասխանում հաստատված պահանջներին, որոշ դեպքերում թերբեռնված են կամ արդյունավետ չեն օգտագործվում:
Կարեն Կարապետյանը հանձնարարեց գործադիրի բոլոր անդամներին պետական գույքի կառավարման վարչության հետ միասին մեկամսյա ժամկետում ուսումնասիրել զբաղեցված շենքային տարածքների օգտագործման արդյունավետությունը և ներկայացնել միասնական հստակ առաջարկություններ՝ այդ տարածքների օպտիմալացման և ավելի նպատակային օգտագործման ապահովման վերաբերյալ: