ԱԺ պատգամավոր Էդմոն Մարուքյանն առաջարկում է ապակուսականացնել որոշ պետական հանձնաժողովներ: Կառավարության այսօրվա նիստին Արփինե Հովհաննիսյանի ներկայացմամբ գործադիրն անդրադարձավ պատգամավորի փաթեթին:
Համաձայն նախագծերի փաթեթի` ՀՀ տնտեսական մրցակցության պաշտպանության պետական հանձնաժողովի, հանրային ծառայությունները կարգավորող հանձնաժողովի, Հեռուստատեսության և ռադիոյի ազգային հանձնաժողովի անդամները, ինչպես նաև Վերահսկիչ պալատի նախագահը և Վերահսկիչ պալատի խորհրդի անդամները չեն կարող լինել որևէ կուսակցության անդամ կամ զբաղվել քաղաքական գործունեությամբ: Նախագծերին կից ներկայացված հիմնավորմամբ` վերոհիշյալ լրացումների նախատեսումը պայմանավորված է Հանձնաժողովների, ինչպես նաև Վերահսկիչ պալատի խորհրդի կողմից իրենց լիազորությունների անաչառ իրականացումն ապահովելու անհրաժեշտությամբ:
Կառավարությունը նշեց, որ հաշվեքննիչ հանձնաժողովի (ներկայիս Վերահսկիչ պալատ) և Հեռուստատեսության և ռադիոյի ազգային հանձնաժողովի անդամների ապաքաղաքականացվածության վերաբերյալ դրույթները շատ ավելի վաղ են ուշադրության արժանացել: Մասնավորապես՝ խնդրի վերաբերյալ դեռևս սահմանադրական բարեփոխումների ընթացքում սահմանադրական բարեփոխումների հանձնաժողովը քննարկման առարկա է դարձրել նշված խնդիրները և միջազգային փորձի ուսումնասիրմամբ լուծումներ նախատեսել:
Մի դեպքում որոշ երկրներ չեն նախատեսել քաղաքական գործունեությամբ զբաղվելու արգելքներ, սակայն նշված մարմինների անկախության համար նախատեսել են այլ ընթացակարգեր, մեկ այլ դեպքում` ուղղակիորեն սահմանել են ապաքաղաքականանացված լինելու պահանջ:
Նշված ընթացակարգերից, թե որն է առավել արդյունավետ Հայաստանի Հանրապետության կառավարության կողմից արդեն իսկ ուսումնասիրման առարկա է դարձել:
Հայաuտանի Հանրապետության կառավարությունը օրենսդրական նախաձեռնության հեղինակին առաջարկեց ձեռնպահ մնալ նախագծերի փաթեթի քննարկումից, հրավիրեց մասնակցելու քննարկումներին և նշեց, որ ներկա փուլում դեմ է ներկայացված նախագծերի փաթեթի քննարկմանը և ընդունմանը:
