Ինչպես հայտնել էինք, Մարդու իրավունքների պաշտպանի երեք թեկնածու է առաջադրված՝ արդարադատության փոխնախարար Արման Թաթոյանը, ԱԺ պատգամավոր Զարուհի Փոստանջյանն ու իրավաբան Նարեկ Ալոյանը:
Արդարադատության ակադեմիայի ռեկտոր Ռուբեն Մելիքյանը Իրավաբան.net-ի հետ զրույցում ասաց, որ իր նախընտրած թեկնածուն Արման Թաթոյանն է: Նա նշեց նախընտրելի թեկնածուի կարևոր հատկանիշները՝ մասնագիտական և անձնական բարձր որակներ:
Ռուբեն Մելիքյանն ու Արման Թաթոյանը միասին աշխատել են Քրեական դատավարության նոր օրենսգրքի մշակման հանձնախմբում: Ռ. Մելիքյանը նշեց, որ Արման Թաթոյանի թե Մարդու իրավունքների պաշտպանի աշխատակազմում, թե արդարադատության նախարարությունում աշխատանքի ընթացքում ձեռք է բերել այնպիսի կարևոր մասնագիտական հմտություններ, որոնք կարևոր են Մարդու իրավունքների պաշտպանի աշխատանքը որակյալ կատարելու համար:
Ռուբեն Մելիքյանը կարևորեց նաև նրա անձնային որակները՝ հաստատակամությունը, կազմակերպական հմտությունները, արդարամտությունը. «Ես վստահ եմ, որ Թաթոյանն այն մարդն է, որ արդարության և ազնվության զգացում ունի. Եթե, օրինակ, ես ՄԻՊ-ի կարիք ունենամ թույլ հարցով, իսկ մեկ այլ քաղաքացի դիմի ՄԻՊ-ին ավելի կարևոր հարցով, ապա նա նախապատվությունը կտա այդ անձին, ում չի էլ ճանաչում: Ես արդարամտության գործոնը հատուկ ուզում եմ կարևորել»:
Իսկ այն հարցին, թե առաջադրված երեք թեկնածուներից ո՞վ է առավել հանրաճանաչ մարդու իրավունքների պաշտպանության ոլորտում, Ռուբեն Մելիքյանը պատասխանեց. «Ես դժվարանում եմ այդ չափանիշը գնահատել, որովհետև դա օբյեկտիվ գնահատման չի ենթարկվում: Անձամբ ես երեք թեկնածուներից մեկի մասին (խոսքը Նարեկ Ալոյանի մասին է,-հեղ.) որևէ տեղեկություն չունեմ, գուցե ես բացառություն եմ և նա հանրաճանաչ է: Մյուս երկուսը, իմ պատկերացմամբ, հանրաճանաչ են»:
