Այսօր Հայաստանի հանրային հեռուստառադիոընկերության խորհուրդը կորոշի՝ ով է լինելու Հանրային ռադիոյի գործադիր տնօրենը: Այս քայլին խորհուրդը գնում է օրենքի խախտումով: Համաձայն՝ Հեռուստատեսության և ռադիոյի մասին ՀՀ օրենքի 28-րդ հոդվածի (Խորհրդի գործունեության կարգը) 6-րդ կետի՝ «Խորհրդի նիստերը դռնբաց են: Խորհուրդն ապահովում է իր գործունեության հրապարակայնությունը»:
Խորհրդի աշխատակազմի ղեկավարը մեզ տեղեկացրեց, որ հերթական նիստը փակ է, մեր այն դիտարկմանը, որ օրենքում հստակ ասվում է, որ բաց են խորհրդի բացառապես բոլոր նիստերը, պատասխանեցին՝ հատուկ որոշում է ընդունել, որ նիստը փակ է անցկացվելու:
Փորձեցինք հիմքերը հասկանալ, սակայն աշխատակազմի ղեկավարը պատճառաբանեց, որ ծանրաբեռնված է ու խնդրեց զանգահարել ավելի ուշ՝ իմանալու՝ ով է նշանակվել ռադիոյի տնօրեն:
Միակ հրապարակային թեկնածուն ԵՊՀ ռադիոհեռուստատեսային ժուռնալիստիկայի ամբիոնի դոցենտ, բ.գ.թ. Աստղիկ Ավետիսյանն է, նա փոխանցեց, որ Հանրային ռադիոյի գործադիր տնօրենի պաշտոնի մրցույթն անցկացվում է օրենքի խախտումներով և փակ մեթոդներով: Մեր զրուցակցի խոսքերով՝ խորհրդից իրեն անգամ չեն հաղորդել նիստի անցկացման մասին: Տիկին Ավետիսյանը դժգոհություն հայտնեց, որ նման եղանակներով ռադիոյի տնօրեն ընտրելով հաստատվում են կասկածները, որ գործընթացը արդար չի իրականացվելու:
Լուսանկարը՝ Հանրային ռադիոյի
