Օմբուդսմենը կրկին ահազանգում է‚ որ ծայրահեղ վատ պայմաններում է գտնվում Կրթության և գիտության նախարարության ենթակայության տակ գտնվող Երևանի թիվ 16 հատուկ դպրոցը‚ որտեղ սովորում է առողջական կամ տեսողական լուրջ խնդիրներ ունեցող 209 երեխա‚ որոնցից 80-ը գիշերում են այնտեղ: Օմբուդսմենը դեռևս անցյալ տարի տեղեկացրել էր նախարար Արմեն Աշոտյանին հատուկ դպրոցի անմխիթար վիճակի մասին‚ սակայն ակնհայտ է‚ որ այս մեկ տարվա ընթացքում անհրաժեշտ քայլեր չեն ձեռնարկվել խնդիրների լուծման ուղղությամբ:
Դպրոցի տանիքը վթարված է‚ առաստաղների և պատերի վրա կան ճեղքեր‚ շատ պատուհաններ չունեն ապակիներ‚ վնասված է մանրահատակը: Տեսողական խնդիրներ ունեցող երեխանների համար նախատեսված հաստատության մի շարք ննջարաններ և դասասենյակներ զրկված են լուսավորումից‚ քանի որ չկան էլեկտրական լամպեր: Բացի այդ‚ առկա են բազմաթիվ բաց հոսանքալարեր‚ որոնք վտանգավոր են 6-16 տարեկան երեխաների կյանքի և առողջության համար: Մարզադահլիճի վատ ջեռուցման պատճառով երեխաները բաճկոններով են մասնակցում դասին: Երեխաների մի մասը գիշերում է հաստատությունում‚ և նման պարագայում խնդրահարույց է‚ որ դպրոցը չունի լոգանքի համար տարրական պայմաններ: Դպրոցում պատշաճ պահպանված չէ նաև սննդի տրամադրման կարգը: Օմբուդսմենի ներկայացուցիչներն արձանագրել են‚ որ ինչպես նախորդ տարի‚ այս տարի ևս պատշաճ չի իրականացվում դեղորայքի տրամադրման գործընթացը: Խիստ մտահոգիչ է այն փաստը‚ որ տեսողության խնդիրներ ունեցող երեխաներին չեն ապահովում հատուկ դասագրքերով:
Ի դեպ‚ այս տարվա նոյեմբերին դպրոցի տնօրինությունն ապօրինի խոչընդոտել է Օմբուդսմենի ներկայացուցիչների մշտադիտարկմանը` ենթադրաբար նպատակ ունենալով կոծկել դպրոցում առկա բազմաթիվ անթույլատրելի խնդիրները: Միջադեպի մասին նախարար Աշոտյանի հետ պաշտոնական գրագրությունից հետո միայն Օմբուդսմենի ներկայացուցիչները կարողացել են մուտք գործել անմխիթար պայմաններով և չափազանց վատ կառավարվող այս հատուկ դպրոցը:
Հայտնենք նաև‚ որ դեռևս 2014 թվականին Կրթության և գիտության նախարարն Օմբուդսմենին տեղեկացրել էր‚ որ բյուջեի պահուստային ֆոնդից գումար է հատկացվել շենքի հիմնանորոգման համար՝ նախահաշվարկներ կազմելու նպատակով: Սակայն կարող ենք միանշանակ փաստել‚ որ հաստատությունում առկա վիճակը շարունակում է մտահոգիչ և չլուծված մնալ: Միակ առաջընթացը‚ որ գրանցվել է մեկ տարվա ընթացքում այն է‚ որ այս տարի չի հայտնաբերվել ժամկետանց դեղորայք‚ ինչպես նաև մասամբ բարելավվել են դպրոցի խոհանոցային պայմանները: Այս մասին հաղորդում են ՄԻՊ գրասենյակից:
