Երեկ Էրեբունիում արձակված կրակոցների հետևանքով վիրավորված երիտասարդներին վիրահատել են:
Նրանցից մեկը՝ Վահագն Գևորգյանը այս պահին գտնվում է «Էրեբունի» բժշկական կենտրոնում: Ինչպես Իրավաբան.net-ին հայտնեց «Էրեբունի» ԲԿ մամուլի պատասխանատու Շուշան Հունանյանը, Վահագնը վնասվածքներ է ստացել կրծքավանդակի և որովայնի մասում: Կատարվել է լյարդի վիրահատություն, որից հետո նրան տեղափոխել են վերակենդանացման բաժանմունք: Բժիշկները նրա վիճակը գնահատում են կայուն-ծանր:
Իսկ մյուս երեք երիտասարդները գտնվում են թիվ 1 համալսարանական հիվանդանոցում: Իրավաբան.net–ին հիվանդանոցի գլխավոր բժիշկ Կարեն Սահակյանը հայտնեց, որ վիրահատությունից հետո նրանց առողջական վիճակը բավականին լավ է:
Հիշեցնենք, որ երեկ Էրեբունի համայնքում Խորենացու փողոցում կրակոցներ են արձակվել, ինչի հետևանքով վիրավորվել է 4 երիտասարդ: Դեպքի առթիվ հարուցվել է քրեական գործ՝ սպանության փորձի և ապօրինի զենք կրելու և օգտագործելու հատկանիշներով:
Ա. Հախվերդյան
