Արդարադատության նախարար Հովհաննես Մանուկյանն այսօր` հուլիսի 2-ի կառավարության նիստին ներկայացրեց գործադիրի եզրակացությունը Ազգային ժողովի պատգամավորՏիգրան Ուրիխանյանի՝ օրենսդրական նախաձեռնության կարգով ներկայացրած «Հայաստանի Հանրապետության ընտրական օրենսգրքում լրացումներ կատարելու մասին» և «Նույնականացման քարտերի մասին»Հայաստանի Հանրապետությանօրենքում փոփոխություն կատարելու մասին» Հայաստանի Հանրապետության օրենքների նախագծերիփաթեթի վերաբերյալ:
Նախարարն ասաց, որ նախագծով առաջարկվում է ՀՀ քաղաքացու ընտրական իրավունքը իրացնել նաև նույնականացման քարտի միջոցով և ՀՀ ընտրական օրենսգրքի 66-րդ հոդվածի 5-րդ մասը լրացնել հետևյալ բովանդակությամբ 5.1-ին կետով.
«5.1. Նույնականացման պլաստիկ քարտում քաղաքացու ընտրություն կատարելու հանգամանքը փաստող էլեկտրոնային նշում կատարելու համար տեղամասային ընտրական հանձնաժողովներին հատկացվում է համապատասխան նշում կատարող սարք»:
Առաջին առաջարկության մասով առարկություն չուներ Հովհաննես Մանուկյանը, իսկ 2-րդ մասով նշեց, որ այն խիստ թերի է և չի պարունակում բազմաթիվ հարցերի վերաբերյալ պատասխաններ:
Վերջում նախարարն ասաց, որ նախագիծը ողջունում են, սակայն հարկ են համարում այն չընդունել:
Վարչապետը հետաքրքրվեց, թե արդյոք քննարկվել է հարցը պատգամավորի հետ, Հովհաննես Մանուկյանն ասաց, որ քննարկում չի եղել. «Ինչո՞ւ չեք քննարկել, ստացվում է այնպես, որ մենք ասում ենք` ողջունելի է, բայց մերժում ենք»,- նշեց Հովիկ Աբրահամյանը: Հովհաննես Մանուկյանը պարզաբանեց, որ առկա է ընթացակարգ, կան կոմիտեներ, հրավիրվում են պատգամավորները ու քննարկում է լինում, ՀՀ Կառավարության աշխատակազմի ղեկավար-նախարար Դավիթ Հարությունյանն էլ հավելեց, որ վերջերս պատգամավորներն ավելի քիչ են գալիս կոմիտեներ` քննարկելու կառավարության հետ իրենց նախագծերը: Այս հավաստիացումները չգոհացրեցին վարչապետին, նա հորդորեց մինչև հարցը կոմիտեներում քննարկելը, հանդիպել նաև պատգամավորների հետ:
