Ինչպես Iravaban.net-ը տեղեկանում է Դատալեքս դատական տեղեկատվական համակարգից, Արարատի և Վայոց Ձորի մարզերի ընդհանուր իրավասության դատարան է մուտքագրվել նոր քրեական գործ՝ ընտանեկան բռնության և անհետաձգելի միջամտության որոշման պայմանների խախտման փաստերով:
Մեղադրանքի էությունը.
Գործի նյութերի համաձայն՝ Ա.Վ.-ին մեղադրանք է առաջադրվել ՀՀ քրեական օրենսգրքի 195-րդ հոդվածի 2-րդ մասի 6-րդ կետով (ընտանեկան բռնություն) երեք դրվագով և 508-րդ հոդվածի 1-ին մասով (անհետաձգելի միջամտության որոշման պայմանների խախտում) երկու դրվագով:
Մեղադրական եզրակացության համաձայն՝ Ա.Վ.-ն, հանդիսանալով Դ.Վ.-ի ամուսինը, 2024 թվականի դեկտեմբերի 15-ին, 2025 թվականի փետրվարի 3-ին և փետրվարի 11-ին կենցաղային հարցերի շուրջ առաջացած վիճաբանությունների ժամանակ ֆիզիկական բռնություն է գործադրել կնոջ նկատմամբ՝ նրա առողջությանը պատճառելով թեթև վնաս չպարունակող մարմնական վնասվածքներ:
Անհետաձգելի միջամտության որոշման խախտում.
Մեղադրական եզրակացությունը նշում է նաև, որ 2025 թվականի փետրվարի 11-ին ՀՀ ՆԳՆ ոստիկանության համայնքային ոստիկանության գլխավոր վարչության Արտաշատի բաժնում Ա.Վ.-ի նկատմամբ անհետաձգելի միջամտության որոշում է կայացվել, որով վերջինիս 25 օրյա ժամկետով արգելվել է այցելել իր կնոջը և նրա խնամքին գտնվող անձանց, ինչպես նաև արգելվել է 100 մետր հեռավորությունից ավելի մոտենալ նրանց:
Սակայն, ըստ մեղադրանքի, Ա.Վ.-ն խախտել է իր նկատմամբ կայացված որոշման պայմանները՝ 2025 թվականի փետրվարի 13-ին և 14-ին ներկայանալով Դ.Վ.-ի փաստացի բնակության վայր՝ Արարատի մարզի Ա. բնակավայրում, որտեղ վիճաբանել է նրա հետ երեխաներին իր հետ վերցնելու և կնոջ հետ միավորվելու հարցերի շուրջ:
Քրեական գործի ընթացքը.
Թիվ ԱՎԴ/0279/01/25 քրեական գործը մուտքագրվել է դատարան 2025 թվականի սեպտեմբերի 9-ին և մակագրվել է դատավոր Բ.Բ.-ին: Մեղադրյալի պաշտպանն է փաստաբան Ա.Պ.-ն:
Որպես խափանման միջոց ընտրվել է բացակայելու արգելք: Գործի քննության ժամկետները դեռևս հայտնի չեն:
Ըստ վիճակագրական տվյալների՝ ընտանեկան բռնության և դրան առնչվող իրավախախտումների գործերը վերջին տարիներին աճի միտում են դրսևորում, ինչը վկայում է այս երևույթի դեմ պայքարի կարևորությունը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
