«Մենք կտրականապես մերժում ենք Հայաստանի վարչապետի 2025 թվականի մարտի 18-ի հայտարարությունը, որը Ադրբեջանի դեմ բոլորովին անհիմն պնդումների հետ մեկտեղ խեղաթյուրում է իրողությունները և սահմանամերձ շրջանների գնդակոծության փաստերը»,- այս մասին ասված է Ադրբեջանի ԱԳՆ հաղորդագրության մեջ։
Ադրբեջանի ԱԳՆ-ն ակնհայտորեն խեղաթյուրել է իրողությունները՝ նշելով, որ կայունության հասնելու հիմնական պայմանն է հրետակոծության դադարեցումը, որը հայտարարել է Ադրբեջանի ՊՆ-ն, ինչպես նաև «տեսագրություններով արձանագրված հայ զինվորականների բացահայտ սադրանքները, որոնց մասին տեղյակ է նաև հայկական կողմը»։
«Հայկական կողմը բարի կամք դրսևորելու և նման սադրանքներից հրաժարվելու փոխարեն առաջարկում է ոչ մի հիմք չունեցող բարդ և գործնականում անհնարին նախաձեռնություններ, ինչպես դա եղավ Հայաստանի կողմից ադրբեջանական տարածքների գրեթե 30-ամյա «օկուպացիայի» ժամանակ։ Եթե Հայաստանի կառավարությունը, ինչպես պնդում է վարչապետի գրասենյակը, իսկապես հավատարիմ է խաղաղության օրակարգին, տեղին կլինի բացատրություն տալ, թե ինչպես է զանգվածային ռազմականացումը, ներառյալ սահմանամերձ տարածքներում հարվածային զենքի տեղակայումը ծառայում այս օրակարգին:
Նաև լուրջ անհանգստություն է առաջացնում, որ չնայած տեղյակ լինելով Ադրբեջանի դեմ տարածքային պահանջներին վերջ տալու համար Սահմանադրության փոփոխության պահանջին, Հայաստանը անտեսում է այս կոչը։ Եվս մեկ անգամ ուշադրություն ենք հրավիրում Ադրբեջանի սկզբունքային դիրքորոշման վրա, այն է, որ բանակցային տեքստի ստորագրման հիմնական պայմանը Հայաստանի Սահմանադրության մեջ փոփոխություններ մտցնելն է՝ Ադրբեջանի ինքնիշխանության և տարածքային ամբողջականության նկատմամբ հավակնությունները վերացնելու համար։ Միևնույն ժամանակ մենք ընդգծում ենք ԵԱՀԿ Մինսկի խմբի և հարակից կառույցների հնացած և անգործունակ լուծարման անհրաժեշտությունը։
Ինչ վերաբերում է հաղորդակցությունների բացմանը, չնայած իր գրավոր և ստորագրված պարտավորություններին Ադրբեջանի արևմտյան շրջանները Նախիջևանի Ինքնավար Հանրապետության հետ կապող հաղորդակցությունների բացման վերաբերյալ, Հայաստանը 4 տարի չի կատարում այդ պարտավորությունները։ Փոխարենը, նրանք առաջարկներ են ներկայացրել երթուղիների վերաբերյալ, որոնք էապես անտեղի էին, դժվար իրագործելի և գործնականում երկար՝ փորձելով շեղել ուշադրությունը գործընթացից և իրենց պարտականություններից։ Եթե հայկական կողմն իսկապես շահագրգռված է տարածաշրջանում հաղորդակցությունների բացմամբ, ապա չպետք է խուսափի իր պարտավորություններից և գործնական քայլեր ձեռնարկի տարածաշրջանի նոր իրողություններին համապատասխան հաղորդակցությունների բացման ուղղությամբ։ Ադրբեջանը կշարունակի խաղաղ ջանքերը բոլոր ուղղություններով և վճռականորեն ճնշելու է այս գործընթացին հակասող քայլերը»,- ասված է այդ երկրի ԱԳՆ հաղորդագրության մեջ։
Հիշեցնենք՝ ՀՀ վարչապետի աշխատակազմը ավելի վաղ հայտարարել էր, որ այս պահի դրությամբ Ադրբեջանի Հանրապետության կողմից Հայաստանի Հանրապետությանը չի փոխանցվել ՀՀ բանակի կողմից հրադադարի ռեժիմի խախտման ոչ մի փաստական տվյալ կամ հիմնավորում։
Նշենք նաև, որ ՀՀ ՊՆ-ն արդեն իսկ մի քանի անգամ հերքել է Ադրբեջանի ՊՆ-ի կողմից տարածված ստահոդ լուրերը՝ հայկական բանակի կողմից այդ երկրի մարտական դիրքերի ուղղությամբ կրակ բացելու վերաբերյալ։
