Օգոստոսի 11-ին ՆԳՆ ոստիկանությունում տեղի ունեցավ աշխատանքային խորհրդակցություն, որը վարում էր ՆԳՆ ոստիկանության պետի տեղակալ, ոստիկանության գնդապետ Կարեն Հակոբյանը։

Այս մասին հայտնում են ոստիկանությունից։

Ներկա էին ՆԳՆ ոստիկանության պարեկային ծառայության, Ճանապարհային ոստիկանության և Օպերատիվ կառավարման կենտրոնի ղեկավար անձնակազմը։

Օպերատիվ կառավարման կենտրոնի պետ Արայիկ Առաքելյանը ներկայացրեց այս տարվա ընթացքում հանրապետության տարածքում արձանագրված ճանապարհատրանսպորտային պատահարների վիճակագրությունը՝ ըստ զոհերի և վիրավորների քանակի։

Օպերատիվ կառավարման կենտրոնի պետը ներկայացրեց նաև մայրաքաղաքում և մարզերում արձանագրված ճանապարհատրանսպորտային պատահարների առավել խոցելի վայրերը՝ միջպետական ճանապարհները, պողոտաները, փողոցները։

Արայիկ Առաքելյանն իր խոսքում անդրադարձավ ճանապարհատրանսպորտային պատահարները կանխելուն և նախականխելուն ուղղված միջոցառումների պարբերականությանը։

Նրանք անդրադարձ կատարեցին ճանապարհատրանսպորտային պատահարների, մասնավորապես՝ վրաերթերի, ինքնավթարների, երկու և ավելի տրասպորտային միջոցների բախման դրդապատճառներին։

Քննարկելով ճանապարհային երթևեկության անվտանգության մակարդակի բարձրացմանն ուղղված աշխատանքները՝ ներկաները վեր հանեցին ճանապարհների լուսավորության, գծանշումների, հետիոտների ոչ սահմանված վայրերով անցնելու և մի շարք այլ խնդիրներ։
Ճանապարհային երթևեկության անվտանգությունն ապահովելու հարցում կարևորվել է նաև քաղաքացիների հետ համագործակցությունը, մասնավորապես՝ վարորդների և հետիոտների պատասխանատու վերաբերմունքը։

Առկա խնդիրների վերացմանն ուղղված հարցերի շուրջ ծավալվեց առարկայական քննարկում։

Խորհրդակցության ավարտին ՆԳՆ ոստիկանության պետի տեղակալ Կարեն Հակոբյանը տվեց հստակ հանձնարարականներ։