«Դիմադրություն» շարժումը ժամը 12։00-ից՝ Ֆրանսիայի հրապարակից 4 ուղղություններով Կենտրոնի մի քանի փողոցներով քայլերթ է իրականացնում։
Ի պատասխան լրագրողների այն հարցին, որ երեկ՝ մայիսի 5-ին, ՀՀ 1-ին նախագահ Լևոն Տեր-Պետրոսյանը հայտարարությամբ էր հանդես եկել, նշելով, որ «եթե մտավորականներն իրապես ցանկանում են ազգանպաստ գործ կատարել, թող ստիպեն Նիկոլ Փաշինյանին, Ռոբերտ Քոչարյանին և Սերժ Սարգսյանին նստել մեկ սեղանի շուրջ և ելք գտնել ներքաղաքական ճգնաժամից», Ազգային ժողովի «Պատիվ ունեմ» խմբակցության պատգամավոր Հայկ Մամիջանյանն ասաց․
«Ամենայն հարգանքով ՀՀ 1-ին նախագահ Լևոն Տեր-Պետրոսյանի նկատմամբ, բայց կապիտուլյանտի հետ մենք ունենք քննարկելու միայն ու միայն իր հրաժարականի տեքստի մանրամասները։ Դրա մասին ես ասել եմ Ազգային ժողովում՝ անցած տարի, որևէ բան դրանում չի փոխվել»,-ասաց նա։
Նա նշեց, որ ցույցերի մասնակիցներին կանչում են թաղապետարան, գտնում են պետական կամ համայնքային ծառայող ազգական, նրանց միջոցով փորձում լռեցնել կամ կասեցնել մասնակցությունը։
