ՀՀ աշխատանքի և սոցիալական հարցերի նախարար Նարեկ Մկրտչյանը ներկայացրեց 2022 թվականի հունվարի 1-ից կենսաթոշակների և նպաստների չափը բարձրացնելու մասին նախագիծը։
Նախագծով առաջարկվում է 2022 թվականի հունվարի 1-ից սահմանել`
- նվազագույն կենսաթոշակի չափը` 28600 դրամ (26500 դրամի փոխարեն),
- պարտադիր ժամկետային զինվորական ծառայության շարքային կազմի զինծառայողի հաշմանդամության զինվորական կենսաթոշակի չափերը`
ա․առաջին խմբի հաշմանդամի համար՝ 43000 դրամ (40000 դրամի փոխարեն)
բ․ երկրորդ խմբի հաշմանդամի համար՝ 33000 դրամ (33000 դրամի փոխարեն)
գ․ երրորդ խմբի հաշմանդամի համար՝ 30000 դրամ (27000 դրամի փոխարեն)
- պարտադիր ժամկետային զինվորական ծառայության շարքային կազմի մահացած (զոհված) զինծառայողի ընտանիքի անդամի կերակրողին կորցնելու դեպքում զինվորական կենսաթոշակի չափը՝ 30000 դրամ (27000 դրամի փոխարեն)։
Առաջարկվում է բարձրացնել նաև ծերության, հաշմանդամության և կերակրողին կորցնելու դեպքում նպաստների չափերը` դրանք սահմանելով 28600 դրամ (26500 դրամի փոխարեն), իսկ հաշմանդամ երեխա ճանաչված անձի համար՝ 37000 դրամ (26500 դրամի փոխարեն)։
Վարչապետ Փաշինյանի խոսքով՝ շատ կարևոր է, որ ՀՀ քաղաքացիները տեսնեն, որ սա ոչ թե առանձին վերցրած «սպոնտան» որոշումներ են, այլ՝ որոշակի ռազմավարության օղակներ, որը վերջում դառնում է մեկ ամբողջական շղթա:
«Ու եթե սրան ավելացնենք տարածաշրջանի կոմունիկացիաների բացումը ու այն, ինչի մասին խոսել ենք ընտրություններից առաջ ու հետո՝ Հայաստանի ու տարածաշրջանի համար խաղաղ զարգացման դարաշրջան բացելու մեր օրակարգը. այս բոլոր հարցերը ունեն շատ լուրջ բարդություններ, եթե այդ ամենը հեշտ լուծելի լիներ, վաղուց լուծված կլիներ, բայց դա մենք համարում ենք մեր քաղաքական առաքելությունը, որ մենք, այո, այս փոթորկված օվկիանոսում մեր սիրելի հայրենիքը, մեր նավը պետք է հասցնենքն խաղաղ նավահանգստի», – ասաց վարչապետը:
