ԱԺ պատգամավոր Արման Եղոյանը ֆեյսբուքյան իր էջում գրել է․ «Որոշ ուժեր ոչ մի կերպ չեն ցանկանում հաշտվել այն մտքի հետ, որ Հայաստանում օլիգարխիկ կառավարման, այսինքն՝ քչերի իշխանության համակարգը ավարտվել է… կազմաքանդվել է հիմնահատակ և անվերադարձ։
Հայաստանում հիմա իշխանությունը պատկանում է ժողովրդին, Հայաստանի քաղաքացուն, այսինքն՝ յուրաքանչյուրին, ավելի կոնկրետ՝ այն քաղաքացուն, ում պակասող ՄԵԿ ձայնի պատճառով որոշ կուսակցություններ չանցան խորհրդարան, մյուսներին էլ չհաջողվեց հատել բաղձալի 1/5֊ի շեմը։
Այդ մեկ քաղաքացու հետ խոսելու փոխարեն, ահա, հիմա նրանք էլի արտաքին ուժ են հրավիրում Հայաստանի կառավարության և քաղաքական մեծամասնության դեմ։
Լսեք, մի՞թե դժվար է հասկանալ, որ եթե հարց ունեք, խնդիր ունեք, դժվար կացության մեջ եք կամ ուղղակի ուզում եք մեկի հետ կիսվել, ձեր զրուցակիցը պիտի լինի Հայաստանի Հանրապետության հենց այդ մեկ քաղաքացին»,-գրել է նա։
