Սեպտեմբերի 27-ին, ժամը 17.40-ին, հիվանդանոցից ոստիկանության Արաբկիրի բաժին հաղորդում էր ստացվել, որ որովայնի պատռված վերքով Արամ Խաչատրյան փողոցի շենքերից մեկի բակից բուժօգնության է տեղափոխվել 15-ամյա պատանի։
Այս մասին տեղեկացնում է ոստիկանությունը:
Նա հիվանդանոցում հայտնել էր, որ շենքի բակում ընկել է: Հիվանդանոց մեկնած ոստիկաններին բժիշկը տեղեկացրել էր, որ պատանին աջ գոտկային շրջանում ունի կտրած-ծակած արնահոսող վերք, այլ վնասվածքներ, իսկ փոքր կոնքում առկա է հեղուկ: Պատանին ի վիճակի չի եղել բացատրություն տալու:
Ոստիկանության Արաբկիրի բաժնի ծառայողների ձեռնարկված օպերատիվ-հետախուզական միջոցառումների շնորհիվ պարզվել է, որ տուժողը վնասվածքները ստացել է ժամը 16.30-ին՝ Արամ Խաչատրյան փողոցի շենքերի միջնամասում գտնվող խաղահրապարակում վիճաբանության ժամանակ 16-ամյա մի պատանու դանակով հարվածելու հետևանքով։ Բացատրական աշխատանքների շնորհիվ սեպտեմբերի 29-ին, ժամը 13.30-ին, կասկածվողը ներկայացել է բաժին և տվել խոստովանական ցուցմունք:
Ձեռնարկվում են միջոցառումներ հանցագործության գործիքը հայտնաբերելու ուղղությամբ:
Կատարվում է նախաքննություն:
