Բարձրագույն դատական խորհուրդը հայտարարություն է տարածել, որում ասվում է.
«Մամուլում և Ֆեյսբուք սոցիալական ցանցում տեղեկություն է տարածվում, թե Դատական դեպարտամենտի ղեկավար Կարեն Փոլադյանին ՝ՀՀ նախագահի հրամանագրով շնորհվել է արդարադատության գեներալ-մայորի կոչում:
Լրատվամիջոցները, առանց ամսաթիվ ճշտելու, հղում են անում ‹‹Տավուշ›› հայրենակցական միության փոխնախագահ Լավրենտի Միրզոյանի ֆեյսբուքյան գրառմանը, որով Միրզոյանը շնորհավորական և դրական խոսքեր է ուղղում Կարեն Փոլադյանին:
Ինչ խոսք, շնորհակալ ենք նման դրական վերաբերմունքի և հաճելի ուշադրության համար:
Սակայն տեղեկացնենք, որ Կարեն Փոլադյանին Հայաստանի Հանրապետության դատական ծառայության 2-րդ դասի բարձրագույն խորհրդականի դասային աստիճան շնորհվել է դեռևս 3 տարի առաջ՝ ՀՀ Նախագահի 2016 թվականի հունիսի 14-ի ՆՀ-467-Ա հրամանագրով:
Լրատվամիջոցներին խնդրում ենք առավել զգոն լինել՝ ուշադրություն դարձնելով տեղեկության ժամանակային ճշգրտությանը»:
