Մայրաքաղաքում հաճախացել են տնտեսվարող սուբյեկտների կողմից փողոցների երթևեկելի գոտիներում ավտոկայանմանը խոչընդոտող արգելապատնեշների տեղադրման փաստերը: Այս երևույթը հարուցել է երևանցիների արդարացի դժգոհությունը, որը նկատի ունենալով էլ ոլորտում խիստ վերահսկողություն է սահմանվելու:
Երևանի քաղաքապետարանի աշխատակազմի տրանսպորտի, առևտրի և սպասարկումների վարչությունների, հասարակական կարգի պահպանության ծառայության և Ճանապարհային ոստիկանության աշխատակիցների ուժերով հերթական համատեղ ստուգայցն էր կազմակերպվել՝ անթույլատրելի այս գործունեությունը կասեցնելու նպատակով: Ստուգայցի ընթացքում մի շարք փողոցներից առգրավվել են արգելապատնեշներ: Ճանապարհային ոստիկանությունից պարզաբանել են, որ Վարչական իրավախախտումների վերաբերյալ ՀՀ օրենսգրքի 140–րդ հոդվածի 1-ին մասով սահմանվել է վարչական տուգանք՝ 30 000 դրամի չափով: Սակայն ոստիկաններն այս անգամ բավարարվել են բանավոր զգուշացումներով: Բանավոր զգուշացումներ են արվել նաև կարմիր գծանշումով գոտիներում տեղադրված ավտոկրպակների, կցորդների սեփականատերերին:
Հիշեցնենք, որ «Առևտրի և ծառայությունների մասին» ՀՀ օրենքով հստակեցված է շրջիկ առևտրի սահմանումը, սակայն շրջիկ առևտրի կազմակերպման պահանջներն օրենքով դեռևս կանոնակարգված չեն: Ներկայումս մշակվել է օրենսդրական նախագիծ՝ օրենքում փոփոխություններ և լրացումներ անելու համար: Հետևաբար, այս պահին ցանկացած դրսևորում համարվում է անօրինական գործունեության ծավալում: Ստուգայցերը մայրաքաղաքում կլինեն շարունակական:
Տեսանյութը՝ քաղաքապետարանի
![](https://iravaban.net/wp-content/uploads/2018/11/b94e97daa7db6dae4cb0f70a64954fa2e419786a.jpeg)
![](https://iravaban.net/wp-content/uploads/2018/11/c9a195096001e602fc1384233c5922e9af814bb0.jpeg)