Առողջապահության համաշխարհային կազմակերպության տվյալների hամաձայն՝ եվրոպական տարածաշրջանի երկրներում գրիպի և սուր շնչառական վարակների համաճարակային իրավիճակը համապատասխանում է տվյալ ժամանակահատվածի օրինաչափ ընթացքին: Եվրոպական տարածաշրջանի երկրներում (42 երկիր) դեռևս պահպանվում է նշված հիվանդությունների հիվանդացության ցածր ակտիվությունը: Հիմնականում արձանագրվում են գրիպի Բ տեսակը և գրիպ Ա տեսակի H1 ենթատեսակը: Նմանատիպ իրավիճակ է դիտվում նաև տարածաշրջանի երկրներում՝ Ռուսաստանի Դաշնությունում և Վրաստանում:
Հայաստանի Հանրապետությունում գրիպով և սուր շնչառական վարակների առումով իրավիճակը համահունչ է եվրոպական տարածաշրջանում համաճարակային իրավիճակին: Դիտվում է սուր շնչառական վարակների օրինաչափ ընթացք: 2017 թվականի 48–րդ շաբաթում արձանագրվել է սուր շնչառական վարակների 2726 դեպք, 2016 թվականի՝ 14639 դեպքի համեմատ (նվազում՝ 5,3 անգամ): Արձանագրված դեպքերի 80%-ը հիմնականում դիտվում է 0-14 տարեկան երեխաների շրջանում: Հոսպիտալներում հետգրիպային բարդություններով ծանր հիվանդներ չկան:
Իրականացված լաբորատոր հետազոտությունների տվյալների համաձայն` այսօր հանրապետությունում շրջանառում են ինչպես գրիպի Ա և Բ տեսակները, այնպես էլ շնչառական վարակների հարուցիչներ՝ ռինովիրուսներ, պարագիրպ և ռեսպիրատոր սինտիցիալ վիրուսներ:
Գրիպից և դրա բարդություններից խուսափելու նպատակով՝ ՀՀ առողջապահության նախարարությունը կրկին հիշեցնում է.
– խուսափե´ք գրիպանման երևույթներով հիվանդների հետ շփումից,
– եթե հիվանդ եք՝ մնացե´ք տանը,
– եթե հիվանդ եք, հրավիրեք տեղամասային մանկաբույժին, թերապևտին կամ ընտանեկան բժշկին և մի´ զբաղվեք ինքնաբուժմամբ,
– մի´ օգտագործեք հակաբիոտիկներ, քանի որ դրանք ցուցված չեն գրիպի բուժման համար,
– հագնվե´ք եղանակին համապատասխան,
– պահպանե´ք հազի և փռշտալու վարվելակարգը,
– օգտագործե´ք հնարավորինս շատ հեղուկներ,
– հաճախակի օդափոխե´ք փակ տարածքները,
– հետևե´ք անձնական հիգիենային:
