Սեպտեմբերի 24-ին ԱԺ տնտեսական հարցերի մշտական հանձնաժողովի հերթական նիստում առաջին ընթերցմամբ քննարկվել է «Մաքսային կարգավորման մասին» օրենքում փոփոխություններ և լրացումներ կատարելու մասին» օրենքի նախագիծը։ Այն ներկայացրել է ՀՀ պետական եկամուտների կոմիտեի նախագահի տեղակալ Համլետ Սահակյանը։ Iravaban.net-ը տեղեկանում է ՀՀ Ազգային ժողովից:
Նախագծի մշակումը պայմանավորված է «Մաքսային վճարների միասնական հաշիվ» էլեկտրոնային համակարգի ներդրման անհրաժեշտությամբ։ Նոր համակարգը նպատակ ունի բարձրացնել մաքսային վճարների գծով պարտավորությունների հաշվառման և մարման ընթացակարգերի արդյունավետությունը։
Նախագծի ընդունման դեպքում նախատեսվում է․
- միասնական հաշվի կիրառում համապատասխան դրամական միջոցների համալրման եւ այդ միջոցներով պարտավորությունների մարման նպատակով` անկախ մաքսային մարմնից եւ վճարի տեսակից,
- անհատական հաշվի հասանելիություն արտաքին տնտեսական գործունեության մասնակիցների համար,
- տույժերի ինքնաշխատ հաշվարկ եւ հաշվառում` համաձայն օրենսդրությամբ նախատեսված դեպքերի եւ կարգի,
- պարտավորությունների ինքնաշխատ մարման հնարավորություն` համաձայն վճարողի կողմից սահմանված կարգաբերումների,
- գերավճարների տնօրինման, գումարների վերադարձի ընթացակարգերի դյուրացում։
Հանձնաժողովը դրական եզրակացություն է տվել նախագծին:
