Արցախից բռնի տեղահանված Արեն Հայրապետյանը Հայաստանի Հանրապետության քաղաքացիություն է ստացել, սակայն հիմա ցանկանում է հրաժարվել այդ անձնագրից, խնդիրն անձնագրում նշված ծննդավայրն է․ «Ադրբեջան»։
Ասում է՝ ծնվել է, մեծացել է, ամբողջ կյանքն ապրել է Ստեփանակերտում, ինչու են նշել Ադրբեջան։ Նկատենք, որ Արցախից բռնի տեղահանված և ՀՀ քաղաքացիություն ստացած ոչ բոլոր անձանց անձնագրում է ծննդավայրը նշվում Ադրբեջան։
«Քաղաքացիություն եմ ընդունել, գրած ա Ադրբեջան։ Եղել է ԽՍՀՄ, Ղարաբաղը եղել է այդ կազմում և եղել է ԼՂԻՄ։ Անձագիրը ստանալուց հարցրել եմ, ասել են՝ էդ ա։ Հիմա երդմնակալությանը չեմ մասնակցել։ Ինչի՞ համար երդմնակալություն տամ, Ադրբեջանի անձնագրի համա՞ր։ Ասեմ՝ ես երդվում եմ լինել ՀՀ քաղաքացի, բայց Ադրբեջանի անձնագրո՞վ»,-նշում է նա։
Մեր զրուցակիցն ասում է, որ քաղաքացիություն է ընդունել, որպեսզի կարողանա օգտվել բնակարանային ապահովման ծրագրից, քանի որ 5 երեխայի հայր է։ Ընտանիքից քաղաքացիություն ընդունել են ինքը և կինը։ Իր խոսքով՝ իրեն հայտնել են՝ եթե դառնան ՀՀ քաղաքացի, երեխաներն ինքնաբերաբար կդառնան քաղաքացի և կկարողանա օգտվել այդ ծրագրից։
Նկատելի է, որ պատշաճ իրազեկվածության խնդիր կա, նա այսօր արդեն իրեն խաբված է համարում։
«Սկզբում ասել են, որ ծնողները քաղաքացի դառնան, երեխաները «ավտոմատ» կդառնան քաղաքացի, սերտիֆիկատը կստանանք, ես էլ միամիտ-միամիտ, ուրախացած գնացի էս Ադրբեջանի անձնագիրը վերցրի, ասեց չէ՝ երեխեքն էլ պետք է ստանան քաղաքացիություն։ Խի՞ եք խաբում, ասում եք՝ բազմազավակներն առանց հերթ են, բազմազավակ եմ, տվեք»,-ասում է նա։
Մանրամասները՝ տեսանյութում։