«Խոսելու տեղ չունեմ»,-դատական նիստից հետո լրագրողների հետ զրույցում ասաց Ոստիկանության զորքերի նախկին հրամանատար Լևոն Երանոսյանը։ Նշենք, որ դատարանը քիչ առաջ նախկին ոստիկանապետ Վլադիմիր Գասպարյանին և Լևոն Երանոսյանին մեղավոր ճանաչեց, սակայն պատիժը չի կիրառվի՝ հղում անելով 2018 թվականին արված համաներմանն ու վաղեմության ժամկետին։
Երանոսյանը լրագրողների հետ զրույցում ասաց, որ դատական ակտը բողոքարկելու են։ Նա նաև նշեց, որ իրեն մեղավոր չի ճանաչում. «Չեմ կարող ասել՝ դատավորի վրա ճնշում կար, թե՝ ոչ։ Բայց համենայնդեպս, սա վճիռ չէր, որ կայացվեց»։
Հիշեցնենք, որ այս քրեական գործով կա 4 մեղադրյալ՝ Վլադիմիր Գասպարյանը, Լևոն Երանոսյանը, ոստիկանության ներքին աուդիտի վարչության նախկին պետ Վարդան Թունյանը, ոստիկանության զորքերի զորամասի նախկին հրամանատար Գուրգեն Գրիգորյանը։
Նրանց նկատմամբ որպես խափանման միջոց է կիրառվել ստորագրությունը՝ չհեռանալու մասին։
Հիշեցնենք, որ 2023 թ. հուլիսին ՀՀ հակակոռուպցիոն կոմիտեն հայտնեց, որ ՀՀ նախկին ոստիկանապետ Վլադիմիր Գասպարյանն օրինականացրել (լվացել) է հանցավոր ճանապարհով ստացված ընդհանուր շուրջ 2 մլրդ դրամի գույք:
