«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը ֆեյսբուքյան իր էջում գրառում է կատարել՝ հայտնելով․
«Ֆրեդին պաշտոնապես դարձավ ամենաերկար արևադարձային ցիկլոնը:
Համաշխարհային օդերևութաբանական կազմակերպությունը (ՀՕԿ) ճանաչել է արևադարձային Ֆրեդի ցիկլոնը, որպես ռեկորդային ամենաերկարատև արևադարձային ցիկլոնը՝ 36 օր: «Ֆրեդին» հատել է Հնդկական օվկիանոսի ավազանը՝ սկսելով Հյուսիս-արևմտյան Ավստրալիայի ափից և հասել Հարավային Աֆրիկա 2023 թվականի փետրվարին և մարտին՝ հանգեցնելով լուրջ զոհերի և տնտեսական կորուստների:
ՀՕԿ փորձագետների միջազգային կոմիտեն, որն աշխատում է Եղանակի և կլիմայի ծայրահեղ երևույթների արխիվի հովանու ներքո, մանրամասն վերլուծություն և ստուգում է անցկացրել ցիկլոնի անցած տարածության և դրա տևողության մասին:
Գնահատող հանձնաժողովը ճանաչեց Ֆրեդիի արևադարձային ցիկլոնի տևողությունը՝ 36,0 օր, որպես նոր համաշխարհային ռեկորդ: 1994 թվականին Խաղաղ օվկիանոսի հյուսիսային մասում նախկին ռեկորդակիր «Ջոն» արևադարձային ցիկլոնի գոյության տևողությունը կազմել է 714 ժամ կամ 29,75 օր։
Ինչ վերաբերում է հեռավորությանը, ՀՕԿ-ի վերլուծությունը ցույց է տվել, որ արևադարձային ցիկլոն Ֆրեդին անցել է 12785 կմ ± 10 կմ արևադարձային փոթորկի կարգավիճակով կամ ավելի բարձր: Եվ սա միայն երկրորդն է Ջոն արևադարձային ցիկլոնից հետո, որն անցել է 13159 կմ ± 10 կմ տարածություն:
ՀՕԿ-ը կթարմացնի եղանակային և կլիմայական ծայրահեղությունների իր արխիվը՝ նոր ռեկորդներն արտացոլելու համար: Արխիվը ներառում է տվյալներ աշխարհի ամենաբարձր և ամենացածր ջերմաստիճանների, տեղումների քանակի, ամենաուժեղ կարկտի, ամենաերկար չորության, ամենաբարձր քամու պոռթկումների, ամենաերկար կայծակի և եղանակի հետ կապված մահերի մասին: Այն օգտագործվում է եղանակի «պատմաբանների» և, ավելի հաճախ, քաղաքական գործիչների կողմից»:
